Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի բոլոր փաստաբանները ՀՀ քաղաքացիներ են, այլ հարց է, որ որոշակի փորձագետների կարծիքներ ենք մենք ստացել, որոնք գրված են հեղինակավոր մասնագետների կողմից: Դրանք ընդամենը հիմնավորել են այն դրույթները, որոնք ներկայացնում է մեր պաշտպանական կողմը: Այս մասին «Կենտրոն» հեռուստաընկերության «Ուրվագիծ» հաղորդաշարի եթերում հայտարարել է ՀՀ 2-րդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը` պատասխանելով հարցին, թե արդյոք Քոչարյանի պաշտպանական թիմում կան ներգրավված օտարերկրյա փաստաբաններ:

Հարցին՝ ինչո՞ւ Քոչարյանը Սերժ Սարգսյանի կառավարման տարիներին քաղաքականություն վերադառնալու մասին չհայտարարեց ու անում է դա միայն հիմա, երբ նրա դեմ գործ է հարուցվել, Սողոմոնյանը պատասխանել է. «Ես տեխնիկապես չէի կապի Քոչարյանի վերադարձը քաղաքականություն այս կամ այն իրադարձության հետ, պարզապես մի շարք հարցեր են կուտակվել ու հիմա այդ ամենը հիմք է ստեղծում, որպեսզի ՀՀ 2-րդ նախագահը վերադառնա ակտիվ քաղաքականություն: Եթե դուք համարում եք, թե նա վերադառնում է այդ դատական գործի պատճառով, ապա չարաչար սխալվում եք, ճիշտ հակառակը` նրա վերադարձը ինքնին դարձել է նրա դեմ քաղաքական հետապնդումների պատճառ: 2-րդ նախագահն ունի Սահմանադրությամբ իրեն վերապահված իմունիտետ, նրան չի կարելի կալանավորել, ինչը և հաստատեց ՀՀ Վերաքննիչ դատարանը, բայց մյուս կողմից շատ հետաքրքիր է, երբ գիշերը ժամը մեկն անց կես դատական նիստ է նշանակվում, և կալանավորում են մի մարդու, ով օրենքով սահմանված կարգով ամբողջ օրը հսկվում է ԱԱԾ-ի ուժերի կողմից` որպես նախկին նախագահ: Ու այդ մարդուն գիշերվա դատական նիստով հրատապ կալանավորում են, որպեսզի հանկարծ չփախչի: Ես կօգտվեմ պարոն Փաշինյանի բառապաշարից ու կասեմ` բա քաղաքական հետապնդումը հո պոզով-պոչով կենդանի չէ՞, սա է քաղաքական հետապնդումը»։