Ձեր վստահելի աղբյուրը

Գյուղատնտեսության նախարար Արթուր Խաչատրյանն այսօր ամփոփելով իր պաշտոնավարման 100 օրը՝ ներկայացրեց ոլորտի զարգացմանը առաջնահերթությունները։ Առաջինն, ըստ նրա, վերաբերում է փոքր ու միջին գյուղացիական տնտեսություններին աջակցությանը: 

«Պետական աջակցությունը միտված է լինելու սոցիալական աջակցությունից  եկամտաբեր գյուղատնտեսության անցմանը, արդյունավետությանը»,- ասաց նա:

Երկրորդը վերաբերում է հողերի խոշորացմանն ու կոոպերացիաների ստեղծմանը:

«Մեզ համար կարևոր է հողերի խոշորացումը՝ պահպանելով սեփականության իրավունքը։ Եթե սա կարողանանք կատարել, ապա այդ հողերը կկարողանանք ապահովել կաթիլային համակարգով։ Հողերի խոշորացումը հնարավորություն կտա մեծացնել նաև ցանքաշրջանառությունը»,- ասաց Արթուր Խաչատրյանը:

Հաջորդն, ըստ նրա, վերաբերում է անմշակ հողերի կրճատման ու ինտենսիվ ժամանակակից գյուղատնտեսության զարգացմանը. «Գյուղատնտեսությունը առաջ է շարժվում 7 մղոնանոց քայլերով, ցավոք սրտի, մեզ մոտ դեռ այդպես չէ, նոր մոտեցումներն այդքան էլ տարածված չեն»:

Արթուր Խաչատրյանը ներկայացրեց նաև ոլորտի զարգացմանը միտված երեք կարևոր գործիքները: Դրանցից առաջինը վերաբերում է սուբսիդավորմանը:

Ըստ նախարարի՝  մինչ օրս օգտագործվող սուբսիդավորման քաղաքականությունը երկու ուղղությամբ է գնացել. առաջինը հումքի սուբսիդավորումն է, երբ գյուղացիներին սուբսիդավորված գներով տրամադրում էին կալիումական, ֆոսֆորական, ազոտական պարարտանյութ, սերմացու, ինչպես նաև դիզելային վառելիք: Նրա խոսքով՝ հիմա փորձում են այլ մոտեցման գնալ, մասնավորապես, գումարը տրամադրել վերջնական սպառողին, որն էլ որոշի, թե ումից ինչ սերմացու, վառելանյութ կամ պարարտանյութ գնի:

Արթուր Խաչատրյանը նշեց, որ մյուս մոտեցումը կապիտալի սուբսիդավորումն է լինելու: «Հիմա կապիտալի սուբսիդավորման մեխանիզմ ենք առաջարկել, երբ ներկրողը որոշակի սուբսիդիա է ստանում, վերահսկողական գործառույթ էլ պետք է լինի, որ կառուսելի մեխանիզմը չգործի»,- ասաց նա:

Նախարարն անդրադարձավ նաև խորհրդատվական ծառայություններին՝ նշելով, որ այն խորհրդատվությունը որ տրամադրում են, այնքան էլ արդյունավետ չէ, ուստի հստակ հանձնարարական կա՝ մշակել նոր հայեցակարգ: Այդ ծառայություններն, ըստ նրա, պետք է լինի այն շտապօգնությունը, որ գյուղացին երբ ունենա խնդիր, անմիջապես գնա այդ կազմակերպություն, հասկանա՝ խնդիրը որն է և ինչ պետք է անել:

Արթուր Խաչատրյանը խոսեց նաև Վրաստանի կառավարության որոշման մասին, ըստ որի, սեպտեմբերի 15-ից արգելվելու է ցամաքային ճանապարհով ցորենի և որոշ հացահատիկային կուլտուրաների  ներկրումը։  Նախարարի խոսքով՝ այդ արգելը գործում է բոլոր երկրների համար, նաև՝  Վրաստանի:

«Հիմնավորումն այն է, որ մեծ մեքենաները վնասում են Լարսի ճանապարհը և առաջարկում են երկաթգծով բեռները տեղափոխել Հայաստան: Հիմա Հայաստանի և Վրաստանի  համապատասխան գերատեսչությունների միջև բանակցություններ են ընթանում, որ որոշակի զեղչեր ստանանք երկաթգծից: Այսինքն՝ փոխադրման փոփոխությունն էական ազդեցություն չունենա ցորենի գների վրա: Եթե զեղչն էական լինի՝ գների թանկացում, հնարավոր է, չլինի, իսկ եթե զեղչ չլինի, ապա որոշ հաշվարկներով՝ մեկ կգ ցորենը կթանկանա 25 դրամով: Դա հոռետեսական ամենավատ հաշվարկներն են»,- նշեց Արթուր Խաչատրյանը:

Ինչ վերաբերում է հացահատիկի առումով Հայաստանի ինքնաբավ լինելուն, գյուղատնտեսության նախարարն ասաց, որ եթե հողատարածքի վրա կարելի է աճեցնել ավելի բարձրարժեք մշակաբույս, և այդ հողը մասնավորին է պատկանում, ինչո՞ւ պետք է նա նվազ եկամուտ ապահովող ցորեն աճեցնի: «Մեր խնդիրն այն է, որ  կարողանանք մարդկանց օգնել ավելի ցածրարժեք մշակաբույսից անցում կատարել բարձրարժեքի, իսկ անմշակ տարածքներում պետք է ցորեն ցանել»,- նշեց նա:

Նշենք, որ ասուլիսից հետո պարզ դրաձավ, որ «Հարավկովկասյան երկաթուղի» ՓԲԸ ու «Վրացական երկաթուղի» ԲԸ համատեղ որոշման համաձայն, 2018 թվականի սեպտեմբերի 1-ից Փոթի նավահանգիստ -Հայաստան հաղորդակցությունում հացահատիկային բեռների երկաթուղային փոխադրումների սակագները կնվազեն 52 տոկոսով: