Ձեր վստահելի աղբյուրը

«Ցեղակրոն» կուսակցության առաջնորդ Շանթ Հարությունյանի որդին՝ Շահեն Հարությունյանը, երեկ իր ֆեյսուքյան ուղիղ եթերի ժամանակ խոսել է իր հոր գործի մասին, թե ինչու ազատ չեն արձակում։ Նա նախ հիշեցնում է, որ նախահեղափոխության ընթացքում Նիկոլ Փաշինյանը հայտարարում էր, որ «քաղբանտարկյալ Շանթ Հարությունյանն օր առաջ, ժամ առաջ պետք է ազատ արձակվի»։ 

«Նիկոլ Փաշինյանն այն մարդն է եղել, որ գնացել, կանգնել եմ կողքը, իմ մտքի ծայրով անգամ չեմ անցկացրել մի առանձին զրույց ունենալ Նիկոլ Փաշինյանի հետ՝ արդյոք իմ հայրը հեղափոխությունից կամ իշխանափոխությունից հետո ազատ կարձակվի, քանի որ վստահել, հավատացել եմ իրեն, վստահել  եմ իր խոսքին, և եթե նա հանրային կերպով խոստացել է, որ Շանթ Հարությունյանն  ազատ կարձակվի, անվերապահ հավատալով՝ միացել եմ իր շարժմանը ու իմ փոքրիկ ներդրումն եմ ունեցել թափշյա հեղափոխության ժամանակահատվածում»,-  ասել է Շահեն Հարությունյանը։

Այնուհետև նա հայտարարել է. «Խոստանում եմ՝ դուրս եմ գալու փողոց՝ կլինեմ մենակ, երկուսով, 10 հոգով, կամ 100 հոգով։ Դուրս կգամ ու կպահանջեմ, որպեսզի անհապաղ ազատ արձակվի Շանթ Հարությունյանը։ Հետո այնպես չլինի, որ չեմ զգուշացրել, հակահեղափոխական եմ։ Ազատեք հորս։ Ես իմ խաղաղ անհնազանդությունն եմ իրականացնելու։

Մինչև հոկտեմբերի 7-ն ունեք ժամանակ։ Խնդրում եմ, պարոն Փաշինյան, լուծեք խնդիրը։ Մինչև Ֆրանկոֆոնիան ժամանակ եմ տալիս։

Ես «սպառնում» եմ իշխանություններին՝ դուրս գալ և իմ խաղաղ անհնազանդությունն իրականացնել։ Հետո հանկարծ Նիկոլը չկանգնի ուղիղ եթերով, ասի՝ դա սաբոտաժ է մեր դեմ։ Սաբոտաժ չէ, նախապես զգուշացնում եմ»։

Վարչապետի մամուլի քարտուղար Արման Եղոյանը ֆեյսբուքյան էջում գրել է.

«Շանթ Հարությունյանի՝ բանտում գտնվելու հետ կապված հարկ եմ համարում ընդգծել.
1. Վարչապետ ընտրվելու հենց առաջին օրերից Նիկոլ Փաշինյանը զբաղվել է այդ հարցով և պարզել, որ Շանթ Հարությունյանի և խմբի ազատ արձակելու հարցում կառավարության ունեցած միակ օրինական լծակը կալանքի ռեժիմը փոխելն է:
2. Կայացվել է որոշում Շանթ Հարությունյանի, նրա գործով դատապարտված Վարդան Վարդանյանի և Լիպարիտ Պետրոսյանի պահման պայմանները փոխել կիսաբացից բաց ռեժիմի, այնպես, որ նրանք փաստացի լինեն ազատության մեջ, ինչից օգտվել են Վարդան Վարդանյանը և Լիպարիտ Պետրոսյանը:
3. Շանթ Հարությունյանը հրաժարվել է նման որոշմամբ դուրս գալ բանտից՝ պահանջելով իրեն արդարացնել:
4. Վարչապետը դրանից հետո խնդրել է Շանթ Հարությունյանին հրավիրել «Վարդաշեն» քրեակատարողական հիմնարկի պետի աշխատասենյակ եւ հեռախոսազրույց է ունեցել նրա հետ, պարզաբանելով, որ ինքն իրեն չի կարող թույլ տալ դատարաններին հրահանգ արձակել, որովհետև դա կլինի նախորդ իշխանության գործելակերպի շարունակություն, եւ Շանթ Հարությունյանին խնդրել է ստորագրել փաստաթղթերը և դուրս գալ բանտից, և ազատության պայմաններում պայքարել իր արդարացման համար:
5. Վարչապետը նաև ընդունել է Շանթ Հարությունյանի որդուն՝ Շահեն Հարությունյանին եւ պարզաբանել, որ նաև ինքը՝ Նիկոլ Փաշինյանը մինչև օրս համարվում է դատապարտված (հանցավոր արարք թույլ տված) 2008 թվականի մարտի 1-ի գործով, շարունակում է պայքարել իր արդարացման համար, բայց նաև համոզված է, որ այս գործընթացը պետք է տեղի ունենա ոչ թե քաղաքական հրահանգներով, այլ օրինականության խստիվ պահպանմամբ:
6. Շանթ Հարությունյանը կարող է ազատ արձակվել ցանկացած պահի, երբ համաձայնի ստորագրել պահման ռեժիմը փոխելու համար անհրաժեշտ փաստաթղթերը»:

2014 թ. հոկտեմբերի 17-ին Կենտրոն և Նորք Մարաշ վարչական շրջանների ընդհանուր իրավասության առաջին ատյանի դատարանի որոշմամբ «Ցեղակրոն» կուսակցության նախագահ Շանթ Հարությունյանը դատապարտվել էր 6 տարվա ազատազրկման:

Շանթ Հարությունյանին մեղադրանք է առաջադրվել այն բանի համար, որ նա մի խումբ անձանց հետ, որպես զենք օգտագործվող առարկայի գործադրմամբ, կատարել է խուլիգանություն` զուգորդված իշխանության ներկայացուցչին դիմադրություն ցույց տալով: