Ձեր վստահելի աղբյուրը

Հայաստանի երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը «Կենտրոն» հեռուստաընկերության «Ուրվագիծ» հաղորդաշարի եթերում հույս է հայտնել, որ առաջիկայում կվերանա Ռոբերտ Քոչարյանի տնօրինած միլիարդների մասին առասպելը:  Ըստ Սողոմոնյանի` 2-րդ նախագահի ընտանիքի հետ կապվող բիզնեսները և բաժնեմասերը հրապարակային են ու հասանելի բաց աղբյուրներում, իսկ լրագրողները, որոնք այսքան տարի գրել են տարբեր բանկերի ու հանքերի մասին, շատ լավ գիտեն, որ այդ պնդումներն անհիմն են:

«Չեմ կասկածում, մոտակա ամիսների կամ շաբաթների ընթացքում լրագրողների ու իշխանությունների օգնությամբ ճշմարտությունը կհաստատվի: Նույն այդ լրագրողներն ու իշխանությունները վաղուց գիտեն, որ չկան նման ցուցակներ, որ Պղնձամոլիբդենային կոմբինատը Քոչարյանինը չի: Հայաստանում հարյուրավոր մարդիկ ունեն  նույն ծավալի բիզնեսներ, ինչը ունի Քոչարյանի ընտանիքը, այդտեղ ոչ մի արտասովոր բան չկա: Դա քաղաքացու գրպանի հետ կապ ունեցող բան չի, դա շաքարավազի ներկրում չի, հեռախոսների ներկրման բիզնես չի. Հիմնականում սպասարկման ոլորտի ու գյուղատնտեսական արտադրանքի հետ կապված բիզնեսներ են»,-նշել է Վիկտոր Սողոմոնյանը: 

Ըստ Սողոմոնյանի` Ռոբերտ Քոչարյանն արդեն տասը տարի աշխատում է ԱՊՀ-ի ամենադիվերսիֆիկացված կորպորացիաներից մեկում՝ որպես անկախ տնօրեն, ու բավականին մեծ վարձատրություն է ստանում:

«Այնպես որ, անիմաստ է այստեղ փնտրել ժողովրդի թալան, կեղեքում, տարբեր ընկերություններ, բարեկամներ, չկա այդ ամենը, կան բացարձակապես օրինական, հրապարակային, երբեք չթաքցվող բիզնես միավորներ, որոնցում Քոչարյանի ընտանիքը որոշակի մասնակցություն ունի: Ինքն անձամբ որևէ ձեռնարկության մեջ չկա ու չի եղել, նա եղել է գործող նախագահ ու անթույլատրելի է դա համարել: Մյուս կողմից անհասկանալի է, թե ինչու Քոչարյանի կառավարման օրոք եղած տնտեսական բումից ու բիզնեսի աննախադեպ զարգացումից բոլորը կարող էին օգտվել, իսկ իր որդի բիզնեսմենը չէր կարող օգտվել»,-մեկնաբանել է Ռոբերտ Քոչարյանի գրասենյակի ղեկավարը: