Ձեր վստահելի աղբյուրը

ՀՀ երկրորդ նախագահ Ռոբետ Քոչարյանը «Sputnik Արմենիա»-ին տված հարցազրույցում անհրաժեշտ է համարել, որպեսզի  իշխանությունները վերանայեն Մարտի 1-ի գործի նկատմամբ որդեգրած մոտեցումը։

«10 տարի առաջ մարդիկ, որոնք այն ժամանակ հրահրել են մասսայական անկարգություններ, իրենց լոզունգներով և քայլերով, ըստ էության, փորձել են տապալել սահմանադրական կարգը, նրանք այսօր փորձում են վրեժխնդրության հարց լուծել մարդկանց նկատմամբ, որոնք այն ժամանակ իշխանության գլխին էին։ Սա է գործի ամբողջ էությունը, և այս խնդիրն է դրված քննչական մարմնի առջև։ Պետք է ընդամենը հրաժարվել այդ մոտեցումից»,-ասել է ՀՀ երկորդ նախագահը։

«Այո՛, պետք է փորձել քննել Մարտի 1-ը, բայց պետք է փորձել գտնել մարդկանց, որոնք կրակել են և կրակել են ոչ միայն քաղաքացիների վրա, որոնք կրակել և սպանել են երկու ոստիկանի, և միայն այդ դեպքում մենք կարող ենք խոսել քրեական գործի ամբողջական բացահայտման մասին։ Իսկ տվյալ դեպքում այս գործն ունի քաղաքական ենթատեքստ, և ես այն որակում եմ միայն որպես քաղաքական վենդետա: 10 տարի անց եկան իշխանության և փորձում են պատմությունը փոխել` արդարացնելու համար այն հանցագործությունները, որոնք արվել են հենց իրենց կողմից, մաքրելու այն դատավճիռները, որ կայացվել են հենց իրենց նկատմամբ և որոնք օրինական ուժ ունեն մինչև այսօր»,-հավելել է նա։

Քոչարյանը նաև անդրադարձել է նույն գործի շրջանակներում ՀԱՊԿ քարտուղար Յուրի Խաչատուրովին՝ ասելով. «Հայաստանի համար անվտանգությունն այսօր կարևորագույն հարցերից մեկն է։ Սա այն միակ կառույցն է, որի մեջ ներգրավվելով մենք էապես բարձրացնում ենք մեր անվտանգության մակարդակը, և յուրաքանչյուր քայլ` կապված այդ կառույցի հետ, Հայաստանի Հանրապետությունում պետք է արվի շատ զգույշ։ Ես ծանոթ չեմ գործի այդ հատվածի մանրամասներին, բայց կրկնեմ` քրեական գործ այստեղ չկա, և այն, ինչ արվեց Խաչատուրովի հանդեպ, հեռատեսական քայլ չէր, մի քայլ էր, որը բավական լուրջ մտահոգություն ստեղծեց կազմակերպության շրջանակներում. հնարավոր է նաև, որ մեր տեղը կորցնենք այդ քրեական գործի պատճառով։ Չեմ կարծում, որ քրեական գործի առումով որևէ հեռանկար կա, բայց վնասն արդեն իսկ հասցված է»։