Ձեր վստահելի աղբյուրը

Իրենց հոր՝ Միխայիլ Խաչատուրյանին սպանելու մեղադրանքով մեկուսարանում գտնվող Խաչատուրյան  երեք քույրերից երկուսը չեն ավարտել հանրակրթական դպրոցը և սեպտեմբերի 1-ից կշարունակեն ուսումը մեկուսարանին կից դպրոցում։  Ռիա նովոստիին հայտնել է  Մոսկվայի Պատժի կրման դաշնային ծառայության մամուլի ծառայության ղեկավար Սերգեյ Ցիգանկովը։

Նա նշել է, որ  այն դպրոց չէ բառի սովորական իմաստով, կրթությունը տարվում է վիդեոկապի ձևաչափով։

«Ուսուցիչներ չկան, կազմակերպվում է հեռահար ուսուցում վիդեոկապի միջոցով»,- հայտնել է Սերգեյ Ցիգանկովը։

Հայտնի է, որ ձերբակալման պահին Անգելինա և Մարիա Խաչատուրյանները սովորում էին 11-րդ դասարանում, Քրիստինա Խաչատուրյանը՝ բժշկական քոլեջի երկրորդ կուրսում։

Հիշեցնենք, որ ՌԴ քննչական կոմիտեն հայտնել էր, որ հուլիսի 27-ին Ալտուֆևյան մայրուղու բազմահարկերից մեկի մուտքում հայտնաբերվել է  57-ամյա տղամարդու մարմին՝ պարանոցի և կրծքավանդակի շրջանում դանակի բազմաթիվ հարվածներով։  ՔԿ  տվյալներով, նրան դանակով հարվածներ են հասցրել երեք աղջիկները։ Նրանց  մեղադրանք է առաջադրված։  Աղջիկները հաստատում են, որ տղամարդը, գտնվելով թմրամիջոցի ազդեցության տակ, առաջինն է հարձակվել  նրանց վրա դանակով, նրանք էլ պաշտպանվել են։ Խաչատուրյան քույրերը կալանավորված են։