Ձեր վստահելի աղբյուրը

ՌԴ նախագահ Վլադիմիր Պուտինի ու Հայաստանի վարչապետ Նիկոլ Փաշինյանի հանդիպումը նախատեսված է առաջիկայում։ «Ռիա Նովոստի» գործակալության փոխանցմամբ, հայտարարել է ՌԴ ԱԳ նախարար Սերգեյ Լովրովը։

«Մոտ ժամանակներս ևս մեկ հանդիպում է նախատեսված։ Կարծում եմ, որ մեզ համար կարևոր է լսել՝ ինչպես է Հայաստանի նոր ղեկավարն անձամբ գնահատում իր երկրում իրավիճակի զարգացման հեռանկարները։ Իհարկե, մեզ համար միևնույն չէ, թե այս իրավիճակում ինչպես են ընթանում ՀԱՊԿ առջև ստանձնած Հայաստանի պարտավորությունները։ Մենք ելնում ենք այն բանից, որ այդ պարտավորությունները գործում են,  դրանք պետք է իրականացնել ամբողջությամբ, այդ թվում նրանք, որոնք վերաբերում են մեր կազմակերպության հեղինակության ամրապնդմանը»,-ուսանողների հետ հանդիպման ժամանակ իր ելույթում ասել է Լավրովը։

Հիշեցնենք,  երեկ երեկոյան  Ֆեյսբուքի ուղիղ եթերում պատասխանելով օգտատերերի հարցերին Հայաստանի վարչապետ Նիկոլ Փաշինյանը հայտնել է,  որ առաջիկայում այցելելու է Մոսկվա։

«Մոտ ապագայում ծրագրված է իմ այցը Մոսկվա, որտեղ հանդիպելու եմ Ռուսաստանի նախագահ Վլադիմիր Պուտինի հետ։ Դա մեր երրորդ հանդիպումը կլինի։

Համոզված եմ, որ մանրամասն կքննարկենք մեր օրակարգին վերաբերող շատ հարցեր, և կգտնենք լուծումներ։ Չեմ ուզում պնդել, որ բոլոր հարցերի լուծումները կգտնենք, բայց վստահաբար ասում եմ, որ մեր հարաբերությունները բնականոն ընթանում են»: