Ձեր վստահելի աղբյուրը

«Ռուսաստանից Ադրբեջան զենքի մատակարարման պայմանագրերի 5 միլիարդ դոլար գնահատման մասին հայտարարությունը չի ազդի տարածաշրջանի կայունության և խաղախության պահպանման վրա»,- Panorama.am-ի թղթակցի հետ զրույցում այսպիսի կարծիք հայտնեց ԱՀ նախագահի աշխատակազմի տեղեկատվության գլխավոր վարչության պետ Դավիթ Բաբայանը՝ մեկնաբանելով սեպեմբերի 1-ին կայացած Պուտին-Ալիև հանդիպումն ու հայտարարությունները։

«Սա ոչ թե նոր զենքի  գնման պայմանագիր է, այլ ընդհանուր առմամբ մինչ այս կնքված պայմանագրերի գնահատականն է։ Մենք հույս ունենք, որ ՌԴ-ն շահագրգռված է, որպեսզի տարածաշրջանում պատերազմ չլինի, քանի որ հանդիսանում է նաև ԵԱՀԿ Մինսկի խմբի համանախագահող երկիր և ջանքեր է  գործադրում, որպեսզի տարածաշրջանում պահպանվի խաղաղություն ու կայունությունը։ Համոզված եմ, որ ՌԴ-ն կպահպանի հավասարակշռվածությունը և նույնիսկ, եթե զենք մատակարարի Ադրբեջանին, ավելի որակով, ուժեղ զենք կմատակարարի հայկական կողմին, որպեսզի հավասարակշռվածությունը պահպանվի, քանի որ միշտ ասում ենք, որ Ադրբեջանն ահաբեկչական երկիր է և նույնիսկ ռագատկա այդպիսի պետությանը չի կարելի տալ»,- ասաց Բաբայանը։

Հարցին, թե արդյոք իրողություն չի՞ փոխվել և այն չի՞ ազդում զենքի վաճառքի գործընթացի վրա, նա պատասխանեց. «Նոր իշխանությունները հայտարարում են, որ հավասարակշռված քաղաքականությունը շարունակվելու է, դա շատ կարևոր է, քանի որ ցանկացած խարխլում կարող է բերել անկանխատեսելի հետևանքների»։

Ինչ վերաբերում է Պուտին և Ալիև բանակցությունների արդյունքում ստորագրված ավելի քան 10 փաստաթղթին, Դավիթ Բաբայանն ասաց. «Ռուսաստանը գերտերություն է, և փորձում է բարիդրացիական հարաբերություններ ունենալ իր բոլոր հարևանների հետ, մենք պետք սա հանգիստ ընդունենք, պարզապես անենք հնարավորը, որպեսզի նույն ադրբեջանը երբևիցե մեզնից առավելություն չստանա»։

Նշենք, որ Արցախի հանրապետության նախագահի խորհրդական Տիգրան Աբրահամյանն այսօր News.am-ին տված մեկնաբանությունում անդրադառնալով ռուսական լրատվամիջոցների  հրապարակումներին, նշել է, որ «Ադրբեջանի՝ ռազմական գործողություններին նախապատրաստվելու վերաբերյալ հայտարարությունների ֆոնին, դժվար է այս տեղեկատվությունը հենց այնպես շրջանցել»:

Ընդ որում, ըստ Աբրահամյանի, ռուսական լրատվամիջոցներով եկող այս լրատվական հոսքին զուգահեռ, ադրբեջանական լրատվամիջոցները հայտնում են նաև Թուրքիայի, Բելառուսի, Իսրայելի հետ ռազմա-տեխնիկական համագործակցության խորացման, դրանց հեռանկարների ու առաջիկայում սպասվող նոր ձեռքբերումների մասին։