Ձեր վստահելի աղբյուրը

«Լարսի աշխարհագրական դիրքն այնպիսինն է, որ անսահմանափակ անցակետեր չեն կարող կառուցվել։ Համոզվել ենք, որ այդ ժամանակ որևէ քաղաքական նկատառում չկար», - այս մասին այսօր լրագրողների հետ հանդիպմանն ասաց ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը՝ անդրադառնոլավ Լարսի անցակետի ընդլայնման հարցին։

«Լարսի ճանապարհը կառուցելիս ոչ ոք չի հաշվարկել, որ երրորդ երկրից՝ Թուրքիայից կանցնեն դեպի Ռուսաստան, և որևէ մեկը չէր հաշվարկել, որ Բաթումին կդառնար այդպիսի տուրիստական մեծ կենտրոն»,-նշեց նախարարը։

Անդրադառնալով այլընտրանքային ճանապարհ ունենալու հարցին, Աշոտ Հակոբյանն ասաց, որ այն վերաբերում է միայն բեռափոխադրումներին, և դա Հարավային Օսիայի հատվածն է. «Ներկայումս բանակցություններ են ընթանում ռուսական և վրացական կողմերի և շվեցարական SGS ընկերության միջև, որպեսզի այդ կազմակերպությունը կարողանա միջանկյալ այդ հատվածում կատարի մեր բեռնափոխադումները», - նշեց նա։

Ինչ վերաբերում է «Հարավկովկասյան երկաթուղի» ՓԲԸ և «Վրացական երկաթուղի» ընկերության միջև ձեռք բերված պայմանավորվածությանը, որով դեպի Հայաստան ուղարկվող բեռների տեղափոխման արժեքը զեղչվում է 52 տոկոս, նախարարը նշեց, որ այդ պայմանավորվածությունը ներկայումս անժամկետ է. «Վրացական հատվածում 52 տոկոս զեղչելու դեպքում հայկական բեռները Երևան կհասնեն 1 տոննան 24 դոլար նվազ արժեքով»։

Նախարարի խոսքով՝ դեպի Հայաստան երկաթուղով փոխադրվող հացահատիկի համար հատուկ սակագների կիրառման վերաբերյալ պայմանավորվածությունը վերջնական է։ 

Նա հայտնեց, որ այսօր հեռախոսազրույց է ունենալու Վրաստանի գործընկերոջ հետ, քանի որ պայմանավորվածություն ձեռք բերելիս նշված է եղել, թե առանձին դեպքերում կարող են բեռնափոխադրումներ իրականացվել նաև մեքենաներով։

«Այդ «առանձին դեպքերը» բացված չեն և մենք հիմա խնդիր ունենք պարզելու, թե դրանք ինչին են վերաբերում՝ կուտակումներին, ծովի ալեկոծությանը, թե այլ դեպքերին», - հավելեց  նախարարը։