Ձեր վստահելի աղբյուրը

Նախընտրական քարոզարշավի ընթացքում ընտրություններին մասնակցող ուժերին բավականին գումար է անհրաժեշտ գովազդների, բուկլետների, պաստառների համար։ Պարզ է, որ ոչ բոլոր ուժերն ունեն այդ գումարը։ Այդ իսկ պատճառով կազմակերպում են դրամահավաք-երեկոներ,  հանգանակություններ։

Սեպտեմբերի 23-ին կայանալու են Երևանի ավագանու արտահերթ ընտրություններ։ Ընտրություններին մասնակցող ուժերը պարտավոր են ՀՀ կենտրոնական բանկում նախընտրական հիմնադրամ բացել, վերջնաժամկետը սեպտեմբերի 10-ին։ Այդ հաշվին այդ ուժերի համակիրները, կողմնակիցները կարող են գումարներ փոխանցել։ Սակայն արդեն քաղաքական ուժերը սկսել են  գումար հավաքել։

Panorama.am-ը հետաքրքրվեց ընտրություններին մասնակցող ուժերից, թե արդյոք  կազմակերպել կամ կազմակերպելու են հանգանակություններ։

«Լույս» դաշինքից Անի Սամսոնյանն ասաց, որ օգոստոսի 29-ին կազմակերպել էին դրամահավաք միջոցառում, որի ընթացքում իրենց համակիրները, ընկերները, ծանոթները, բարեկամները  ներդրում են կատարել նախընտրական քարոզարշավի համար։  Ընդհանուր գումարը կազմել է 2 միլիոն 655 հազար դրամ։

«Կունենանք նաև դրամական փոխանցումներ արտերկրի մեր համակիրներից, բարեկամներից»,- հավելեց Ա.Սամսոնյանը։

Սեպտեմբերի 2-ին տեղի է ունեցել «Իմ Քայլը» դաշինքի նախընտրական դրամահավաք-երեկոն: «Հայկական ժամանակ»-ին  «Քաղաքացիական պայմանագիր» կուսակցության մամուլի խոսնակ Վահան Կոստանյանն ասել է, որ միջոցառման ընթացքում հանգանակվել է 22 մլն 198 հազար 652 դրամ։ Եղել է նաև ևս 20 միլիոն դրամի նվիրատվության խոստում։

Panorama.am-ը «Ժառանգություն» կուսակցության ցուցակում ընդգրկված Արմեն Մարտիրոսյանից տեղեկացավ, որ նմանատիպ քայլ այս պահին նախատեսված չէ, հետագայում հնարավոր է։

«Որպես օրենք մեր գործարար աշխարհը փորձում է հեռու լինել մեզ ֆինանսավորելուց։ Չգիտեմ՝  դա ինչքան երկար է շարունակվելու, բայց նման տենդենց կա։ Այնպես չէ, որ ընդհանրապես որևէ աջակցություն չենք ունենում, ուղղակի շոշափելի չէ»,- ասաց նա։

«Երևանի հանրություն» կուսակցությունների դաշինքից Արմեն Հովհաննիսյանն ասաց, որ իրենց դաշինքում հիմնականում ՀԿ-ներ են ընդգրկված, և հիմնական ծախսերը բաժանելու են թեկնածուների ու ՀԿ-ների միջև։

«Լինելու է  հանգանակության հիմնադրամ։ Մենք ունենք համակիրներ, կողմնակիցներ,  կփորձենք իրենց հասցնել տեղեկատվություն մեր հաշվի, նպատակների մասին։ Հուսով ենք՝ այդ խնդիրը կլուծենք»,- ասաց Ա. Հովհաննիսյանը։

Ռեֆորմիստների կուսակցության նախագահ Վահան Բաբայանն ասաց, որ օրենքի սահմանված կարգով հիմնադրամ կբացեն, իրենց գործընկերները, համակիրները, ովքեր ցանկություն կունենան ֆինանսական աջակցության ցուցաբերել  քարոզարշավի համար, կկարողանան գումարներ մուծել այդ հիմնադրամի հաշվին։

«Բնականաբար,  կուսակցությունը չունի նման ֆինանսական ռեսուրսներ,  բայց համակիրները, կարծում եմ, կաջակցեն, որպեսզի տպագրական, գովազդային հարցերում  մենք կարողանանք ինչ-ինչ ծախսեր կատարենք»,- նշեց նա։

Հայաստանի Կենտրոնական ընտրական հանձնաժողովը հրապարակում է տվյալներ ընտրություններում քաղաքական ուժերի նախընտրական հիմնադրամներում կուտակված դրամական միջոցների մասին: Այսինքն, առաջիկայում  պարզ կլինի թե այս, նաև ավագանու ընտրություններին մասնակցող մյուս ուժերի նախընտրական հաշիվներին ինչքան գումար է փոխանցվում։

Սպասենք, որ հրապարակեն նաև ֆինանսների աղբյուրները: