Ձեր վստահելի աղբյուրը

Բուդապեշտում տեղի ունեցած բռնցքամարտի աշխարհի երիտասարդական առաջնությանը Հայաստանը մասնակցում էր 5 մարզիկով, քանի որ ուղեգիր նվաճած մյուս 2 բռնցքամարտիկները վնասվածք էին ստացել: Հայաստանի 3 ներկայացուցիչները քառորդ եզրափակչում պարտություն կրեցին մեդալի համար պայքարում: Երիտասարդական հավաքականի գլխավոր մարզիչ Կարեն Աղամալյանը ՀԲՖ մամուլի ծառայության հետ զրույցում ամփոփել է հայ մարզիկների ելույթները:

«Ուզում եմ նշել, որ պատմության մեջ առաջին անգամ Եվրոպայի առաջնությունից մենք կարողացանք աշխարհի առաջնության 7 ուղեգիր նվաճել: Այս տարի մեծ աշխատանք ենք կատարել և մասնակցել ենք հնարավոր բոլոր միջազգային մրցաշարերին և ուսումնամարզական հավաքներին: Ցավոք, աշխարհի առաջնությունում չկարողացանք մեդալներ նվաճել, բայց ես գոհ եմ իմ բռնցքամարտիկներից: Բոլորը ռինգում կռիվ են տվել մինչև վերջին վայրկյանը:

Մեր մարզիկներից 3-ը մեդալի համար պայքարում պարտվեցին չնչին տարբերությամբ: Բոլոր մասնագետների՝ այդ թվում նաև ադրբեջանցի մարզչի կարծիքով 56 կգ քաշային Ռաֆայել Հակոբյանը քառորդ եզրափակչում հաղթանակի հասավ, սակայն մրցավարները հաղթանակը շնորհեցին Թայլանդի ներկայացուցչին: Մենք ամեն ինչով առաջ ենք անցել մեր հարևան երկրներից:

Հաղթել ենք այնպիսի երկրների, ինչպիսիք են Մեքսիկան, Ուկրաինան, Վրաստանը, Թուրքիան: Թիմային հաշվարկով առաջ ենք անցել Գերմանիայի, Լեհաստանի և մի շարք այլ ուժեղ հավաքականներից: Գոհ եմ թիմից: Այս տղաների մեծ մասը հաջորդ տարի նույնպես կարող է մասնակցել երիտասարդական մրցաշարերի, այնպես որ հաջողությունները դեռ առջևում են»,- ասել է Աղամալյանը