Ձեր վստահելի աղբյուրը

Մոսկվա մեկնելու ու ՌԴ նախագահ Վլադիմիր Պուտինի հետ հանդիպման նախօրեին ՀՀ վարչապետ Նիկոլ Փաշինյանը բացառիկ հարցազրույց է տվել ՀՀ Պաշտպանության նախարարության Զինուժ հաղորդաշարին՝ անդրադառնալով  հայ-ռուսական հարաբերություններին ու ՀԱՊԿ գործունեությանը:

«Ռուսաստանի հետ մեր հարաբերություններն առանձնահատուկ տեղ ու նշանակություն ունեն, և մենք հույս ունենք, որ այդ հարաբերությունների արդյունավետությունն էականորեն կբարձրացվի։ Մեր հարաբերությունները պետք է լինեն շատ ավելի բարձր մակարդակի, շատ ավելի ռազմավարական, շատ ավելի գործընկերային և շատ ավելի եղբայրական»,-ասել է Ն. Փաշինյանը։

Անդրադառնալով ՀԱՊԿ-ին, վարչապետը նշել է, որ կազմակերպության անդամ երկրների ղեկավարների հետ հենց առաջին շփումներում իր համար ակնհայտ է դարձել, որ նույն հարցը կա նաև նրանց մոտ։

«Առաջինը արձանագրել պրոբլեմի գոյությունը և համբերատար, դաշնակցային մթնոլորտում  և տրամաբանության մեջ քննարկել հարցերը, որպեսզի մենք իմանանք, թե ինչ պարտավորություններ ունի ՀԱՊԿ-ը Հայաստանի Հանրապետության առաջ, և ի˚նչ պարտավորություններ ունի  Հայաստանի Հանրապետությունը ՀԱՊԿ-ի և նրա անդամ երկրների առաջ»,-ասել է կառավարության ղեկավարը։

Նշենք, որ հարցազրույցից հայ-ռուսական հարաբերություններին ու ՀԱՊԿ-ին վերաբերող հատվածներն իր ֆեյսբուքյան էջում հրապարակել է վարչապետի մամուլի քարտուղար Արման Եղոյանը։ Վերջինը նշել է, որ հարցազրույցի ընթացքում Փաշինյանը նաև խոսել է ՀՀ զինված ուժերի մարտունակությանն ու նյութատեխնիկական հագեցվածության, Լեռնային Ղարաբաղի խնդրի կարգավորման մեխանիզմների և հնարավորությունների մասին։