Ձեր վստահելի աղբյուրը

Լեռնային Ղարաբաղի հիմնախնդրի խաղաղ հանգուցալուծման գործընթացն արհեստականորեն այլ ձևաչափեր տեղափոխելու փորձերը վնասում են խնդրի հանգուցալուծման հասնելու համանախագահների ջանքերը: Նման կարծիք են հայտնել ՀՀ ԱԳ նախարար Զոհրաբ Մնացականյանն ու Ուկրաինայի նորանշանակ դեսպան Պյոտր Լիտվինը։

ԱԳՆ լրատվության ու հանրային դիվանագիտության վարչության փոխանցմամբ, Զոհրաբ Մնացականյանն ընդունել է Ուկրաինայի նորանշանակ դեսպան Պյոտր Լիտվինին՝ հավատարմագրերի պատճենը հանձնելու կապակցությամբ:

Զրուցակիցները համակարծիք են եղել, որ հիմնախնդրի խաղաղ կարգավորումն այլընտրանք չունի:

Նախարար Մնացականյանը և դեսպան Լիտվինը քննարկել են երկկողմ օրակարգի բազմաթիվ հարցեր՝ առանձնահատուկ ընդգծելով գիտության, մշակույթի և զբոսաշրջության ոլորտներում համագործակցության ընդլայնման ուղղությամբ գործնական քայլերի ձեռնարկման անհրաժեշտությունը:

Զրուցակիցները բարձր են գնահատել Ուկրաինայի հայ համայնքի դերակատարությունը  երկրի հասարակական-քաղաքական, սոցիալ-տնտեսական, գիտակրթական և այլ ոլորտներում:

Առևտրատնտեսական հարաբերությունների խորացման համատեքստում երկուստեք գոհունակությամբ փաստվել է Հայաստանի և Ուկրաինայի միջև առևտրի ծավալների աճը: Միաժամանակ կողմերը համակարծիք էին, որ անհրաժեշտ է գործնական քայլեր ձեռնարկել, այդ թվում՝ Միջկառավարական հանձնաժողովի աշխատանքների շրջանակներում, առևտրատնտեսական  ոլորտում առկա մեծ ներուժը լիովին օգտագործելու նպատակով: