Ձեր վստահելի աղբյուրը

Այսօր Ազգային ժողովի արտահերթ նիստում միաձայն ընդունվեց կառավարության կողմից ներկայացված «ՀՀ քրեական օրենսգրքում փոփոխություններ և լրացումներ կատարելու մասին» և կից ներկայացված օրենքների նախագծերը: Դրանք ընդունվեցին երկրորդ ընթերցմամբ և ամբողջությամբ, կողմ քվեարկեց 82 պատգմավոր, դեմ և ձեռնպահ չկար:

Նշենք, որ նախագծում վարչական դատավարության օրենսգրքում որոշ ընտրական իրավախախտումներ առաջարկում են դարձնել քրեորեն պատժելի՝ հաշվի առնելով դրանց ծանր հետևանքները:

Նշենք նաև, որ կառավարությունը ի պատասխան պատգամավորների մտահոգությունների՝ որոշել էր նախագծում որոշ փոփոխություններ կատարել: Եվ մինչ քվեարկության անցնելը՝ արդարադատության նախարարի տեղակալ Արթուր Հովհաննիսյանն ասաց, որ խոստացված փոփոխությունները կատարվել են:

«Առաջին կարևոր փոփոխությունը «Քվեարկության արդյունք բացահայտող դրույթին» է վերաբերել, որտեղ բացի «շահադիտական դրդումներից» նախատեսված էր նաև «նախապես տրված խոստման հիման վրա քվեարկության արդյունքի բացահայտումը», և այստեղ տարընթերցման տեղիք էր առաջանում, թե նախապես տրված խոստում ասածն իրենից ինչ է ներկայացնում, ում է տրվում այդ խոստումը, երբ է տրվում այդ խոստումը: Եվ դա մենք ընդունելով՝ փոփոխություն կատարեցինք, նախ հանեցինք «նախապես տրված խոստման» բառերը, և թողեցինք, որ միայն անձը շահադիտական նպատակներով պետք է բացահայտի քվեարկության արդյունքը, և այն էլ փաստաթղթի, լուսանկարի և այլնի միջոցով:

Հաջորդ փոփոխությունը  «կաշառք տալու առաջարկը ընդունելու» ձևակերպմանն է վերաբերում, որը կա առևտրային կաշառք հոդվածում: Բայց այստեղ կաշառք ստացողները հատուկ սուբյեկտներ են, ու ընտրողների մոտ կարող էր տարընթերցումներ առաջացնել, դրա համար այս փուլում ընդունեցինք, որ այս ձևակերպումը դուրս է գալիս, ու մնում է միայն այն, ինչը կար 2015 թ-ի ժամանակ, այսինքն՝ «կաշառք ստանալն ու կաշառք վերցնելը»,- ներկայացրեց փոխնախարարը: