Ձեր վստահելի աղբյուրը

«Գերագույն հրամանատարի կարևորագույն հմտությունը և հատկությունը դժվարության, օրհասական պահին հանրությանը, պետությանը, ժողովրդին, զինված ուժերին համախմբելու կարողությունն է»,-նման կարծիք է հայտնել ՀՀ վարչապետ Նիկոլ Փաշինյանը  ՊՆ «Զինուժ» հաղորդաշարին տված հարցազրույցում։

Նրա խոսքով, դա Հայաստանի ռազմաքաղաքական կարևոր ուղղություններից մեկն է, որն ավելացել է նախկինում ունեցած մեկ այլ առավելությանը՝ ուժեղ ու մարտունակ բանակ ունենալուն։

Անդրադառնալով ԼՂ խնդրի կարգավորմանն ու բանակցություններին, կառավարության ղեկավարն ընդգծել է՝ Ադրբեջանը շատ երկար տարիներ իր դիրքորոշումներով ապացուցում է, որ խնդրի լուծման վերաբերյալ իր պատկերացումը պատերազմն է։

«Սա նշանակում է, որ ոչ միայն Հայաստանի Հանրապետությունը, այլև ողջ հայ ժողովուրդը պետք է պատրաստ լինի տալու անհրաժեշտ հակահարված։ Եվ որևէ մեկը չի կարող մեզ հետ սպառնալիքների, հարկադրանքի, ուժի լեզվով խոսել»,-ասել է վարչապետը։

Նա զինվորներին կոչ է արել՝ լինել դուխով. «Մեր զինվորներին ուզում եմ ասել՝ դուխով»։

Հարցազրույցից մի հատված հրապարակվել է կառավարության ֆեյսբուքյան էջում։ Հարցազրույցի՝ Ռուսաստանի հետ հարաբերությունների ու ՀԱՊԿ-ի վերաբերյալ հատվածը երեկ հրապարակել էր վարչապետի մամուլի խոսնակ Արման Եղոյանը։