Թափառական շները սպառնալիք են դարձել բնակիչների ու հատկապես երեխաների համար
Լուսանկարն արվել է այսօր վաղ առավոտյան Երևանի Մալաթիա-Սեբաստիա վարչական շրջանի Հաղթանակ թաղամասի փողոցներից մեկում, այն բանից հետո, երբ շների ոհմակը հարձակվել է դպրոց շտապող երեխաների վրա։
«Բղավոցի վրա դուրս վազեցինք, տեսնենք մի քանի շուն հարձակվել է երեխաների վրա»,-Panorama.am-ի հետ զրույցում պատմեց բնակիչներից մեկը։
Բարեբախտաբար, շները երեխաներին կծել չեն հասցրել։ Թափառական կենդանիներն մայրաքաղաքի այս ու այլ թաղամասերի բնակիչների, երեխաների կյանքի ու առողջության համար լուրջ վտանգ են ներկայացնում։
«Երեկոյան ոտքով մոտակա խանութ գնալ չի լինում, վախենում ենք թողնել, որ երեխեքը բակում խաղան, ամեն րոպե շների հարձակման վտանգը կա»,-բողոքում են բնակիչները։
Կենդանիները խմբերով հավաքվում են հատկապես լցված աղբամաների մոտ։ Հենց այդ տարածքներից մեկում էլ մի քանի ամիս առաջ հարձակվել էին մանկապարտեզից տուն եկող եղբայրների վրա։
«Մի քանի գիշեր երեխան վախից վեր էր թռնում, լացում»,-պատմում է տատիկը։
Գիշերվա ժամերին էլ կենդանիներն իսկական հարսանիք են կազմակերպում շուն ունեցող բնակիչների բակում։
«Քնել չի լինում, օդ ենք կրակում, փախնում են, նորից վերադառնում»,-ասում են նրանք։
Շենգավիթ վարչական թաղամասի Չարբախ թաղամասի բնակիչներն էլ պատմեցին, օրեր առաջ հեծանիվի հետևից վազող շների պատճառով հեծանվորդը վայր է ընկել ու կոտրվածք ստացել։
Հաղթանակ թաղամասի բնակիչները զանգահարել են թաղապետարանի, քաղաքապետարանի թեժ գիծ, սակայն, նրանց խոսքով, ոչ արձագանք են ստացել, ոչ էլ գործողություններ տեսել, շները կան ու գնալով բազմանում են, ավելի ագրեսիվ դառնում։
Շների թեման միշտ երկիմաստ է ընկալվում հասարակության կողմից՝ հաշվի առնելով, որ «շունը մարդու բարեկամն է», ու որ Երևանում հիմնականում խնդիրը «լուծում» են ոչ թե ստերջացման, այլ թափառական շների գնդակահարման միջոցով: Սակայն երբ շները վտանգավոր են դառնում երեխաների համար, կշեռքի նժարը ակնհայտ է, թե որ կողմն է թեքվում: Նշենք, որ սա միակ դեպքը չէ՝ որոշ ժամանակ առաջ կրկին թեման քննարկելի էր ֆեյսբուքում: Մայրը բողոքում էր, որ հարևաններից բակի անտեր շանը կերակրում են, իսկ նա հետո գռմռում և հարձակվում է երեխաների վրա: Իսկ բողոքներին, թե՝ շունը մեղք է, գրել էր՝ «տարեք, ձեր տանը պահեք, թող անվտանգ լինի»:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
