Ձեր վստահելի աղբյուրը

Կրեմլում կայացել է  ՌԴ նախագահ Վլադիմիր Պուտինի ու Հայաստանի վարչապետ Նիկոլ Փաշինյանի հանդիպումը, որը աշխատանքային այցով Ռուսաստան էր ժամանել։

ՌԴ նախագահի պաշտոնական էջի փոխանցմամբ,  քննարկվել են ռոս-հայկական դաշնակցային հարաբերությունների զարգացման, ինչպես նաև ԵԱՏՄ-ում ու ՀԱՊԿ-ում համագործակցության վերաբերյալ առանցքային հարցեր։

Պաշտոնական տեղեկատվության համաձայն, Պուտինը հիշեցրել է, որ Ռուսաստանը վստահաբար առաջին տեղում է Հայաստանի տնտեսական գործընկերների թվում։

«Մենք ամենամեծ ներդրողն ենք Հայաստանի տնտեսության մեջ, և այստեղ կարելի է նշել, որ այդ առումով հարաբերությունները բավականին դիվերսիֆիկացված են՝ էներգետիկա, ընդ որում նաև ջերմային էներգետիկան, գազամատակարարում, ընդ որում ամենացածր գնով, որն աշխարհում միայն «Գազպրոմ»-ն է անում՝ 1 000 խմ-ի դիմաց 150 դոլար, նաև ատոմային էներգետիկա։ Մեր հարաբերությունները զարգանում են նաև մետալուրգիական արդյունաբերության ոլորտում՝ տարբեր ուղղություններով, այդ թվում մեքենաշինության։ Ընդհանուր առմամբ, շատ բան ունենք խոսելու»,-ասել է ՌԴ նախագահը։

Նա ուրախություն է հայտնել, որ անցած տարի երկու երկրների միջև ապրանքաշրջանառությունն աճել է մոտ 30 տոկոսով, իսկ այս տարվա առաջին կիսամյակում այդ աճն արդեն կազմել է 22 տոկոս։

«Այսինքն, եթե գործերն այսպես ընթանան նաև հետագայում, ապա մենք կգերազանցենք անցած տարվա ցուցանիշը։ Մեր համագործակցության ծավալը մեծ է։ Ես շատ ուրախ եմ ձեզ տեսնել, որպեսզի համաձայնեցնենք  միջնաժամկետ հեռանկարում մեր հետագա համագործակցությունը»,-նշել է ՌԴ նախագահը։