Ձեր վստահելի աղբյուրը

«Մեզ համար Երևանը սոսկ քաղաք և բնակավայր չէ, մեզ համար Երևանն արժեք է, մեր ապագան է, մեր երեխաների ապագան է»,- Երևան քաղաքի ավագանու ընտրությունների ՕԵԿ նախընտրական ծրագրի շնորհանդեսին ասաց կուսակցության քաղաքապետի թեկնածու Մհեր Շահգելդյանը։

Խոսելով իրենց ծրագրի մասին, նա նշեց, որ այն մշակվել է ՀԿ-ների, անկախ փորձագետների հետ համագործակցությամբ՝  հաշվի առնելով բոլոր տեսակետները և մոտեցումները։

«Մեր ռազմավարությունը հենված է երկու մտեցումների վրա՝ ռազմավարական ծրագրերի մշակում և իրականացում, օպերատիվ արձագանքումներ  բազմաթիվ հարցերին»,- ասաց քաղաքապետի թեկնածուն։

Նրա խոսքով, իրենց ծրագիրը քառակողմ է, չորս հիմնական ուղղություններ, որոնց մեջ ներգրավում են բազմաթիվ մոտեցումներ։ Մ. Շահգելդյանն ասաց, որ հենքային է լինելու սոցիալական բնակարանաշինությունը, Երևանի կառուցապատումը պետք է լինի ժողովրդական մոտեցումներով։

«Լրջագույն պրոբլեմ է աղբավայրերը։ Ասում են՝ ինչպե՞ս եք լուծելու։ Համակարգված։ Առաջինը գործարանի կառուցումն է։ Դա հնարավոր է անել, այսօր կան առաջարկություններ»,- նշեց Մ.Շահգելդյանը՝ հավելելով, որ պետք է ձևավորվի աղբահանության մրցակցային նորմալ համակարգ։

Նա Երևանի կարևորագույն խնդիր է համարում նաև անվտանգությունը՝ սկսած ճանապարհատրանսպորտային պատահարներից, վերջացրած վերելակներից։  

«Մենք կարող ենք Երևանը բարձրացնել, այդ հնարավորությունը կա։ Պարոն Արթուր Բաղդասարյանի միջազգային կապերը, հետևողական աշխատանքը, գրագետ հարաբերությունները  գործընկերների հետ  թույլ կտան մեր մայրաքաղաքը դարձնել միջազգային չափանիշներին լիովին համապատասխանող, մոդել այլ երկրների համար։

Մենք կարող ենք հաղթել, կարող ենք շենացնել մեր քաղաքը։ Մեզ անհրաժեշտ է կամք, ակտիվ քարոզարշավ, մարդկանց հետ անընդհատ աշխատանք։ Մենք պարզ մարդիկ ենք, ինչպես միջին երևանցին, միջին քաղաքացին։ Մենք ենք և մեր Երևանը»,- ասաց Մհեր Շահգելդյանը։

Երևանի ավագանու արտահերթ ընտրությունները կայանալու են սեպտեմբերի 23-ին։