Ձեր վստահելի աղբյուրը

«Կարծում եմ՝ Հովիկ Աբրահամյանն այս գործով որևէ պատասխանատվություն չունի: Հովիկ Աբրահամյանը պաշտպանվելու ու իր անմեղությունն ապացուցելու ձևը գիտի»,- ԱԺ-ում լրագրողների հետ զրույցում ասաց ՀՀԿ-ական պատգամավոր Ալիկ Սարգսյանը՝ անդրադառնալով «Ավազահատիկ» ընկերության շուրջ ծագած քրեական գործին։

Նա նաև ասաց, որ իրեն մեղադրանք ներկայացրած անձին էլ չի ճանաչում և երբևէ նրան չի տեսել:
«Նրա մասին լսել եմ «Ավազահատիկի» հետ կապված դեպքերի առնչությամբ, որի համար խիստ զարմացել եմ, քանի որ ընդհանրապես տեղեկություն չունեմ, թե ինչի մասին է խոսքը: Բայց քանի որ տվյալ մարդը փորձել է իմ պատիվն արատավորի և իմ անունը հասցրել է այս մակարդակին, ապա ես նրան դատի կտամ, կենթարկեմ նաև ֆինանսական պատասխանատվության և տվյալ գումարը կփոխանցեմ որևէ մանկատան»,-հայտարարեց պատգամավորը:

Նա նաև ասաց, որ դեպքի առթիվ չի հարցաքննվել:

«Ենթադրում եմ, որ այդ գործի շրջանակներում ես էլ կհարցաքննվեմ, չի բացառվում, որ իմ նկատմամբ էլ քրեական գործ հարուցվի: Ցավում եմ, որ առանց համապատասխան ստուգման միանգամից քրեական գործ են հարուցում, որից հետո նոր ստուգումներ են սկսում»,-հավելեց Ալիկ Սարգսյանը։

Նա նաև հայտնեց, իր պատիվն արատավորելու համար հայց է ներկայացրել դատարան: