Ձեր վստահելի աղբյուրը

Հոգեբուժական փորձաքննությունը պարզել է, որ Խաչատուրյան քույրերից ամենաերիտասարդը հոր սպանության պահին չի գիտակցել իր գործողությունները։ Ինտերֆաքսին հայտնել է նրա փաստաբան Յարոսլավ Պակուլինը։

Նա նշել է, որ անցկացվել է փորձաքննություն, նախնական տվյալներով, նրան ճանաչել են անմեղսունակ, հարվածները հասցնելու պահին չի գիտակցել իր գործողությունները։

Փաստաբանը նշել է, որ այսպիսով, նրա պաշտպանյալը կարող է խուսափել քրեական պատասխանատվությունից այն դեպքում, եթե նրա մեղքն ապացուցվի։

«Նման հոգեկան խանգարումը պետք է բացառի արարքի հանցավորությունը»,-ասել է փաստաբանը։

Պակուլինը հավելել է, որ մինչև աղջկան բուժում նշանակվի, նրան տեղափոխել են թիվ 2 մեկուսարանի հոգեբուժական հիվանդանոց։

Փաստաբանը նշել է, որ մյուս երկու քույրերի նկատմամբ փորձաքննություն «ամենայն հավանակությամբ, դեռ չի եղել»։

«Համենայնդեպս ոչ ես, ոչ քննիչը, նման տվյալներ չունենք»,- ասել է Պակուլինը։

Հիշեցնենք, որ ՌԴ քննչական կոմիտեն հայտնել էր, որ հուլիսի 27-ին Ալտուֆևյան մայրուղու բազմահարկերից մեկի մուտքում հայտնաբերվել է  57-ամյա տղամարդու մարմին՝ պարանոցի և կրծքավանդակի շրջանում դանակի բազմաթիվ հարվածներով։  ՔԿ  տվյալներով, նրան դանակով հարվածներ են հասցրել երեք աղջիկները։ Նրանց  մեղադրանք է առաջադրված։  Աղջիկները հաստատում են, որ տղամարդը, գտնվելով թմրամիջոցի ազդեցության տակ, առաջինն է հարձակվել  նրանց վրա դանակով, նրանք էլ պաշտպանվել են։ Խաչատուրյան քույրերը կալանավորված են։