Ձեր վստահելի աղբյուրը

«Սա դավադրություն է, սա հանցագործություն է  Հայաստանի պետականության նկատմամբ»,-Երևանի ավագանու արտահերթ ընտրություններին մասնակցող «Իմ քայլը» դաշինքի քարոզարշավի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով ԱԱԾ տնօրենի և ՀՔԾ պետի հեռախոսազրույցի գաղտնալսմանը:

Նա նշեց, որ հանձնարարել է ԱԱԾ-ին, ոստիկանությանը ամենակարճ ժամանակահատվածում հայտնաբերել դավադրությունը կազմակերպածներին և նրանց ենթարկել ամենախիստ պատասխանատվության։

Ն. Փաշինյանն ասաց, որ դեռևս երբ «Հայկական ժամանակ» օրաթերթի  խմբագիր էր, թերում հրապարակել էր տեղեկություն, որ՝ «մեր տեղեկություններով որոշ  օլիգարխների և պետական բարձրաստիճան պաշտոնյաների հետ կապ ունեցող մարդիկ ժողովրդից թալանված միջոցներով ձեռք են բերել գաղտնալսման սարքեր և, ըստ էության, պետության հատուկ ծառայություններին զուգահեռ ստեղծել են հատուկ ծառայություններ պետության մեջ»:

«Բոլոր չակերտավոր հատուկ ծառայությունները, ապօրինի զինված խմբավորումները սափրագլուխների և ախրանաների տեսքով, հայտնաբերվելու և ոչնչացվելու են, բոլոր ապօրինի զինված խմբավորումները զինաթափվելու են»,- հայտարարեց վարչապետը:

Ն. Փաշինյանն ասաց, որ այստեղից  ԱԱԾ-ին և ոստիկանությանը հրահանգում է այս պահից իրականացնել ռեյդեր օլիգարխների, բարձրաստիճան պաշտոնյաների, այսպես կոչված, թիկնազորներին պառկեցնել ասֆալտներին և զինաթափել բոլորին:

«Պարոնայք Արթուր Վանեցյան և Վալերիյ Օսիպյան, երկու ժամից ես լսեմ ձեր զեկույցը կատարված աշխատանքների և արձանագրված արդյունքների մասին: Ոչ մի մուկ և ոչ մի ձուկ չի պլստալու: Հայաստանում գողերի ժամանակն անցել է, ամերիկաներից լինի, ռուսաստաններից լինի, ավստրալիաներից լինի, գտնելու ենք, բերելու ենք իրենց և իրենց գողացած ամեն լումա, ամեն կոպեկ, ամեն դոլար», -նշեց նա:

Ն. Փաշինյանը դիմեց  Հայաստանի նախկին նախագահներին. «Ռոբերտ Քոչարյան և Սերժ Սարգսյան, դուք որոշել եք Հայաստանի ժողովրդին մարտահրավեր նետել, դե մարտահրավերը տեսեք, դե հիմա սպասեք»։

Նա նաև ասաց, որ ԱԱԾ-ից և ոստիկանությունից պահանջում է  երկու ժամվա ընթացքում կարգ ու կանոն հաստատել ամբողջ հանրապետության տարածքում. «Եթե տեսնենք, որ նրանք ի վիճակի չեն դա անել, մենք էլի ձևերը գիտենք, էն կամուֆլյաժս կհագնեմ և հատ-հատ, փողոց առ փողոց, տուն առ տուն կարգուկանոն կհաստատենք Հայաստանի Հանրապետությունում։ Բայց Հայաստանում պետք է շարունակի տիրել սիրո և համերաշխության մթնոլորտ»։