Ձեր վստահելի աղբյուրը

«Ձայնագրելու տեխնիկական հնարավորություն ունի Ազգային անվտանգության ծառայությունը։ Չեմ կարծում, որ մեր ծառայությունում կան դավաճաններ, որոնք կարող են իրականացնել իրենց ղեկավարի խոսակցությունների գաղտնալսում»,-լրագրողների հետ հանդիպմանը հայտարարեց ԱԱԾ տնօրեն Արթուր Վանեցյանը։

Նա չբացառեց, որ գաղտնալսում իրականացրել են «մեծ փողերով մարդիկ», ովքեր կարողացել են գնել տեխնիկա։

«Կարծում եմ, քննությունը կբացահայտի մանրամասները։ Եթե դավաճաններ կան, պետք է պատասխան տան»,-ասաց նա՝ ավելացնելով, որ չի կարող խոսել ենթադրություններով ու կասկած հայտնել, որ արտաքին ուժերն են գաղտնալսել։

Հրապարակված ձայնագրությունը ԱԱԾ պետը սենսացիա չի համարում, այլ իր ու Սասուն Խաչատրյանի միջև մասնավոր զրույց, համեմատում է խրամատում թշնամու դեմ կռվող զինվորներին թիկունքից քարերով խփելուն։

«Որ խորը մտածեք, կհասկանք, որ ես ճիշտ եմ ասում, տեղի ունեցածն անթույլատրելի բան է։ Մինչ այս էլ գաղտնալսումը կանխող միջոցներ էինք ձեռնարկել, էն էլ պարզվեց, որ միջոցներն արդյունավետ չեն»,-ասաց նա։

Վանեցյանն ասաց, ԱԱԾ-ն ու ՀՔԾ-ն դուրս են եկել պայքարի մի համկարգի դեմ, որն ունի գումարներ, ցավոք սրտի մինչ օրս իշխանական լծակներ։ Որպես օրինակ, նա նշեց, որ իրավապահ համակարգում, այդ թվում իրենց ղեկավարած ծառայություններում կադրային քիչ փոփոխություններ են տեղի ունեցել։