Ձեր վստահելի աղբյուրը

«Մենք Երևանը տեսնում ենք համահայկական կենտրոն»,-  «Մեդիա կենտրոնում»  «Երևանի զարգացման տեսլականը. ինչպե՞ս արդյունավետ կառավարել քաղաքը» թեմայով քննարմանն ասաց  Երևանի ավագանու արտահերթ ընտրություններին մասնակցող «Հայ հեղափոխական դաշնակցություն» կուսակցությունից  Խաչատուր Ստեփանյանը։

Նա նշեց, որ իրենց ծրագրում  հատուկ ընդգծված է այդ կետը, որ ամեն ինչ անելու են, որ Երևանը դառնա բոլոր հայերի մայրաքաղաքը։

Քննարկմանը ներկա «Իմ քայլը» դաշինքից  Տրդատ Սարգսյանն ասաց, որ Երևանն  առաջին հերթին պետք է ծառայի երևանցուն, նաև ողջ հայությանը, որը պետք է ընդունի հյուրերին, դուռը լինի դեպի Հայաստան։

«Լավ քաղաք ասելով՝ հասկանում ենք ունենալ արժանապատիվ տրանսպորտ, աղբահանության արժանապատիվ իրականացման համակարգ,  կանաչապատ տարածք, մշակույթ, ունենալ Երևան բրենդ, որով կարող ենք ներկայանալի լինել, ունենալ հաշվետու քաղաքապետ, քաղաքապետարան, որը գործելու է թափանցիկ, ունենալ առողջապահության բարեկեցիկ հնարավորություն»,-նշեց նա։

«Ժառանգություն» կուսակցությունից  Հովսեփ Խուրշուդյանի խոսքով, Երևանը պետք է լինի ժպտացող քաղաք, երևանցիները  վերջապես պետք է սկսեն ժպտան։ 

«Մարդը ժպտում է, երբ որ բավարարված է, երջանիկ է, ունի այն իշխանությունը, որի մասին երազում էր, ով մտածում է  իր խնդիրների մասին, վստահելի է»,- հավելեց Հ. Խուրշուդյանը։

«Երևանի հանրություն» դաշինքից  Արամ Գրիգորյանի կարծիքով, Երևանը պետք է ունենա այնպիսի կառավարման մարմինները,  որտեղ քաղաքացիները հանգիստ դնեն հարցեր, ստանան իրենց հարցերի պատասխանները, հոգսերը թեթևացնեն, կառավարիչները  մտածեն քաղաքացիների իրավունքների պաշտպանության մասին։

«Որպեսզի ունենանք անհոգ քաղաք՝ հարկավոր է ստեղծել դրան համապատասխան միջավայր՝ կանաչ, առողջ, մաքուր»,- հավելեց նա։

«Հայք» կուսակցությունից Լևոն Թումանյանն ասաց, որ իրենց ցանկությունն է տեսնել  հարմարավետ, ապահով, բարեկեցիկ, անվտանգ, էկոլոգիապես մաքուր, մշակութային, գիտակրթական, զարգացած և հարմաավետ քաղաք։

«Այսօր ապրում ենք ոչ նշված  կետերով քաղաքում։ Ակնհայտ է, որ պատճառն անարդյունավետ կառավարման համակարգն է»,- նշեց նա։

«Ժողովրդավարական ուղի» կուսակցությունից Արթուր Գասպարյանի խոսքով, իրենց ծրագրով առաջին հերթին նախատեսված է պահպանել Երևանի քաղաքաշինական, ճարտարապետական դեմքը, եթե հնարավոր է վերջին տարիների ընթացքում քանդածը վերականգնել ու վերադարձնել երևանցիներին։

«Լույս» դաշինքի  ներկայացուցիչ Դավիթ Խաժակյան խոսքով, Երևանը գոյատևող քաղաքից պետք է դառնա զարգացող քաղաք։ Նրա խոսքով, տարիների ընթացքում նույն բյուջեն կրկնվել է, յուրաքանչյուր մեծ խնդրին փոքրիկ լուծումներ են տրվել, այդպես էլ որևէ խնդիր մեծ հաշվով չի լուծվել։

««Լույս» դաշինքը պատկերացնում է Երևանը որպես զարգացող քաղաք, քաղաքում պետք է հաստատվի արդար, արդյունավետ կառավարում։ Մեր քաղաքապետի թեկնածու պարոն Արտակ Զեյնալյանը,  ունենալով իրավական խորը գիտելիքներ, պետական և տարածքային կառավարման փորձ, կարող է ապահովել Երևանում արդար, արդունավետ կառավարում»,- ասաց Դ. Խաժակյանը։