Ձեր վստահելի աղբյուրը

«Մտահոգություն պետք է բոլորս ունենանք, որովհետև առնվազն բոլորս վարչապետից ակնկալում էինք հստակ գնահատական հեռախոսազրույցի բովանդակության մասին»,- խորհրդարանում լրագրողների հետ ճեպազրույցում ասաց փոխնախագահ Էդուարդ Շարմազանովը՝ խոսելով ԱԱԾ և ՀՔԾ ղեկավարների հեռախոսազրույցի գաղտնալսման հրապարակումից։

Նրա խոսքով՝ ոչ թե ԱԱԾ-ն կամ ՀՔԾ-ն պետք է զարմանա, այլ մենք պետք է զարմանանք, թե ինչպե՞ս են  համապատասխան կառույցների աշխատանքները լսում, ինչու՞ են նրանք այդքան անզգույշ:
«Եթե իրենց լսում են, ուրեմն մեզ էլ կարող են լսել, էլ չեմ ասում, որ թուրքեր ու ադրբեջանցիների հետ կապված բազմաթիվ խնդիրներ կան, համաժողովներ կան, որ մենք պաշտպանված չենք: Մյուս կողմից Մերկելին են լսում, Փաշինյանի անունից զանգում են եվրոպական պաշտոնյաների հետ են խոսում: Սա իհարկե, դատապարտելի է, բայց առավել դատապարտելի է խնդրի բովանդակությունը»,- նշեց ԱԺ փոխխոսնակը։

Շարմազանովի կարծիքով՝ երեկ վարչապետի կողմից փաստերի մանիպուլյացիա տեղի ունեցավ և որևէ մեկը չանդրադարձավ բովանդակությանը։

«Հիմա ես կոնկրետ հարց եմ տալիս՝ եղբայր, դուք բազմաթիվ անգամներ նշել եք, որ դատական մարմինների, իրավապահ մարմինների աշխատանքին չեք միջամտում, ոչ Մարտի 1-ի գործով, ոչ Քոչարյանի, ոչ Խաչատուրովի, ոչ էլ որևէ այլ գործով: Հիմա ոնց եղավ ԱԱԾ պետը դատավոր հետ կապի մեջ է մտնում, ըստ ձայնագրության, և ասում՝ դուխով, ուզես-չուզես, պետք է կալանավորես: Ո՞նց է լինում, որ Խաչատուրովի խափանման միջոցը  որոշվում է ոչ թե փաստերի հիման վրա, այլ՝ ռուսների հետ նոր են բարիշել, ռուսները կնեղանան, թե չեն նեղանա»,- ասաց Շարմազանովը։

ԱԺ փոխնախագահի խոսքով՝ ձայնագրությունն ապացուցեց, որ Հայաստանում կա քաղաքական հետապնդում և քաղաքական պատվեր:

«Ինչ կապ ունի ասֆալտի վրա պառկեցնել, կամ այդ երկու ժամում ո՞ւմ պառկեցրին, երկու հատ խեղճուկրակ նիվայի շոֆեռ: Ինչ է նշանակում ասֆալտի վրա պառկեցնել: Երեկվա իր հայտարարությամբ վարչապետը Հայաստանում հայտարարեց քաղաքական տեռորի ժամանակաշրջանի սկիզբը: Դա վարչապետի՞ ելույթ էր: Ո՞ւմ վրա է մուննաթ գալիս, ի՞նչ կապ ունի Սերժ Սարգսյանը, ինչ կապ ունի ՀՀԿ-ն, մյուս երեք ուժերը»,- հավելեց Շարմազանովը: