Ձեր վստահելի աղբյուրը

Արդեն երկու օր է՝ մեկնարկել է Երևանի ավագանու արտահերթ ընտրությունների նախընտրական քարոզարշավը։ Այն կշարունակվի մինչև սեպտեմբերի 21-ը: Առաջիկա օրերի ընթացքում ընտրությունների մասնակից քաղաքական ուժերը երևանցիներին կներկայացնեն իրենց նախընտրական ծրագրերը, հանդես կգան Երևանի խնդիրներին լուծում տալու սեփական տեսլականով։

Հատկանշական է, որ քարոզարշավի իրենց գործողությունները հանրությանն ակտիվորեն  ներկայացնող ուժերին զուգահեռ՝ կան այնպիսիք, որոնք չեն շտապում բարձրաձայնել սեփական քայլերի մասին, ընտրություններին ընդառաջ նրանց գործողությունները մնում են ստվերում։

Panorama.am-ի թղթակիցը զրուցեց այդպիսի ուժերից մեկի՝ «Հայք» կուսակցության ցուցակը գլխավորող Գևորգ Հովսեփյանի հետ։

Panorama.am- Պարոն Հովսեփյան, ինչպե՞ս եք գնահատում նախընտրական քարոզարշավի մեկնարկը, ինչպիսի՞ ընթացք եք կանխատեսում։

Պատասխան- Մենք ամեն օր մեր կուսակցության ֆեյսբուքյան էջով մտնում ենք ուղիղ եթեր՝ տարբեր թեմաներով։ Դա բավականին մեծ լսարան է ընդգրկում։ Բացի այդ, Երևանի տարբեր թաղամասերում՝ Մալաթիա-Սեբաստիայում, Շենգավիթում, ընտրողների հետ հանդիպումներ ենք ունեցել, վաղը ժողովրդի հետ հանդիպում կունենանք Արաբկիրում։ Միջոցառումներ ենք կազմակերպում, օրինակ՝ դասախոսների շրջանակում։ Ելույթ եմ ունեցել ռադիոյով, հեռուստատեսությամբ, մամուլի ակումբներում։ Հրավիրված ենք տարբեր տեղեր։ Մենք ակտիվ գործընթացի մեջ ենք։

Panorama.am- Ինչպե՞ս եք գնահատւմ ՀՀ վարչապետ Նիկոլ Փաշինյանի այն հայտարարությունը, որ Երևանի քաղաքապետի ընտրությունները հեղափոխության և հակահեղափոխության ընտրություններ են։

Պատասխան- Մենք հեղափոխությանն այլ կերպ ենք նայում, մենք ազգայնականներ ենք։ Եթե եղել է իշխանափոխություն, այն պետք է վերաճի հեղափոխության։ Ազգը չի կարելի մասնատել հեղափոխականների և հակահեղափոխականների։ Հին համակարգն, իհարկե, պայքարում է։ Հեղափոխությունն այն է, երբ արժեքներ են ներդրվում, իսկ ազգային արժեքներն այսօր հարվածի տակ են։ Կարծես թե ուռուցքն է հեռացվել, իսկ մետաստազները մնում են։ Դրանք մեր կյանքում են։ Եթե չենք վերացնում մետաստազները, ապա մեկ է՝ աղբամանները կփոխենք, թե կոյուղին կսկսի լավ աշխատել։ Մյուս կողմից, սրանք, իհարկե, քաղաքապետարանի ուղղակի պարտականություններն են։ Կոնկրետ մենք համագործակցում ենք «Հայ մասնագետների խորհուրդ» կազմակերպության հետ, և ավագանու անդամ ընտրվելու դեպքում անպայման իրականացնելու ենք մեր ծրագրերը։

Panorama.am- Պարոն Հովսեփյան, Երևանի ավագանու ընտրություններին մասնակից ուժերից ո՞ւմ եք ձեզ մրցակից համարում։

Պատասխան- Մենք մրցակիցներ չունենք, ունենք համագործակցողներ։ Մենք արժեհամակարգն ենք կարևորում, մենք ազգայնականներ ենք։ Այսօր ոչ ոք արժեհամակարգից չի խոսում։

Panorama.am- Իսկ ինչո՞ւ երևանցին հենց ձեր քաղաքական ուժին պետք է ձայն  տա։

Պատասխան- Որովհետև մեր խոսքն ուղղված է ոչ միայն երևանցուն և հայաստանցուն, այլև ողջ հայությանը։ Մենք հային, հայ մարդուն ենք դիմում։ Մենք «ում» ընտրելու խնդիր չունենք։ «Ում»-ի խնդիր չէ, այդ փիլիսոփայությունը պետք է ջարդվի, մենք մեր կյանքն ենք ընտրելու, թե ինչ կյանք ենք ուզում։