Ձեր վստահելի աղբյուրը

2008 թվականի  մարտի 1-ի դեպքերի ժամանակ առաջնագիծը նոսրացած չի եղել, առաջնագծում ընթացել է սովորական մարտական աշխատանք: Այս մասին այսօր լրագրողների հետ հանդիպման ժամանակ հայտարարեց ՀՀ զինված ուժերի գլխավոր շտաբի պետ Արտակ Դավթյանը:

«Ես՝ որպես օպերատիվ վարչության պետ, նաև պատասխանատու եմ եղել մարտական հերթապահության կազմակերպման համար: Կարող եմ ասել, որ տվյալ դեպքերի ու առաջնագծի անմիջական գործողություններն իրար հետ պետք չէ կապել»,- հայտնեց Արտակ Դավթյանը:

Նշենք, որ 2007 թվականի հուլիսի 20-ից  2009 թվականի  հունվարի 31-ը նա եղել է ՀՀ զինված ուժերի գլխավոր շտաբի օպերատիվ վարչության պետ-գլխավոր շտաբի պետի տեղակալ։

Արտակ Դավթյանը հայտնեց, որ 10 տարվա վաղեմության դեպքերի վերաբերյալ տեղեկատվությունը, որն իրեն հասանելի է եղել, համապատասխան մարմինների հարցումով բոլոր հարցերին պատասխանել է: Ըստ նրա՝ ընթանում է քրեական գործ, որի շրջանակում ամեն ինչ պարզ կլինի. «Ես չեմ կարող մեկնաբանել գործի նյութերին վերաբերող հարցերը»:

Նա միաժամանակ հայտնեց, որ 2008 թ. մարտի 1-ից հետո՝ մարտի 5-ին, Արցախում կանխվել է դիվերսիոն  ներթափանցման փորձ. «Այդ ժամանակ հակառակորդն ունեցել է 10-12 զոհ, հայկական կողմն ունեցել է 2 վիրավոր: Դրանից հետո, օրինակի համար, մենք 2014-2015 թվականներին ունեցել ենք 80-ից ավելի նման գործողություններ սահմանին»,- ասաց Արտակ Դավթյանը՝  հավելելով,  թե այդ դեպքերը կապել Մարտի 1-ի հետ՝  մի քիչ վիճելի հարց է. «Հիմա ինչի՞ հետ կապենք այդ 80 գործողությունները»:

ԶՈՒ գլխավոր շտաբի պետը նաև նշեց. «10 առաջվա դեպքերի վերաբերյալ կարող եմ ասել՝  սահմանը չի տուժել, չի թուլացել, իսկ գործողությունը, որը եղել է, կապել-չկապելը պետք է հարցնել երևի հակառակորդին, թե չէ ենթադրություններ կարելի է անել»։

Հարցին՝  մարտի 1-ին բանակը կրակել է բնակարանների ուղղությամբ, Արտակ Դավթյանը պատասխանեց. «Բանակը չի կրակել բնակարանների ուղղությամբ, եթե կրակել է՝ կրակել են անհատ ինչ-որ զինծառայողներ, որոնք ունեն ազգանուններ, որոնց տակ կանգնած են անհատ մարդիկ: Ընդհանուր բանակը տասնյակ հազարավոր մարդիկ են, հիմա ասում ենք՝ տասնյակ հազարավոր մարդիկ կրակել են: Տասնյակ հազարավոր մարդիկ չեն կրակել, կրակել են կոնկրետ անհատներ»:

Ճշտող հարցին՝ նման հրաման եղե՞լ է, ԳՇ պետը հայտնեց. «Նման հրաման չի եղել»