Ձեր վստահելի աղբյուրը

«Ազգային ժողովում քննիչ հանձնաժողով ստեղծելու նախաձեռնության անհարժեշտությունը պայմանավորված է երկու կարևոր հանգամանքով՝ որը մեր ամբողջ հանրությանն է հետաքրքրում»,- ԱԺ արտահերթ նիստում  պատգամավորների կողմից Քննիչ հանձնաժողով ստեղծելու մասին նախաձեռնության քննարկման ժամանակ իր ելույթում նշեց ԱԺ պետաիրավական և մարդու իրավունքների պաշտպանության հարցերի մշտական հանձնաժողովի նախագահ Գևորգ Կոստանյանը։

Նա նշեց, որ հանձնաժողովի ստեղծման հիմքում դրել են ոչ թե կոնկրետ հանգամանքը կամ հարաբերությունները, այլ խնդիրը գլոբալ է, որովհետև այդ հանգամանքը ինձ և մեզ, յուրաքանչյուրիս համար հիմնավոր կասկածներ է ստեղծում առ այն, որ եթե ԱԱԾ տնօրենին ու ՀՔԾ պետի խոսակցությունները ձայնագրվում են, ապա դա նշանակում է, որ սահմանադրությամբ և Եվրոպական կոնվենցիայով երաշխավորված յուրաքանչյուր անձի հեռախոսային խոսակցությունների ու հաղորդումների գաղտնիության սկզբունքը առնվազն վտանգված է։

«Մենք պետք է վստահ լինենք, որ մեր պետությունում,  հասարակությունում ձեռնարկել ենք  բոլոր հնարավորությունները՝ երաշխավորելու յուրաքանչյուրի հեռախոսային խոսակցությունների գաղտնիության իրավունքը։ ԱԱԾ և ՀՔԾ ղեկավարների հետ կատարվածը վտանգի տակ է դնում ոչ միայն իրավական անվտանգությունը, այլև առնվազն կասկածի տակ է դրվում մարդու իրավունքների պաշտպանության երաշխիքային սպասարկման հանգամանքները»,- ասաց Կոստանյանը։

Ինչ վերաբերում է գաղտնալսման բովանդակային տեսանկյունին, նա նշեց այստեղ տեսնում են ներգրավվածությունը, որ չպիտի լինի արդարադատության իրականացման գործընթացում։

«Մենք չենք անդրադառնալու հարուցված քրեական գործի հանգամանքներին, նպատակը դա չէ, թե ինչպիսին է եղել ՀՔԾ պետի ու ԱԱԾ տնօրենի հեռախոսային խոսակցության բովանդակությունը, որովհետև սա այլ քննարկման առարկա է։ Մենք խնդիրը դնում ենք գլոբալ, որովհետև յուրաքանչյուր նման քննարկում ու դրա արդյունքում կատարված ուսումնասիրություն, վստահ եմ, կբարձրացնի մեր երկրում մարդու իրավունքների պաշտպանվածության մակարդակը», -հավելեց Կոստանյանը։