Ձեր վստահելի աղբյուրը

Այսօր՝ սեպտեմբերի 13-ին, «Երկիր Ծիրանի» կուսակցության նախագահ և Երևանի քաղաքապետի թեկնածու Զարուհի Փոստանջյանը նախընտրական քարոզարշավի շրջանակներում եղել է Շենգավիթ վարչական շրջանում:

«Երկիր Ծիրանի» կուսակցությունից հայտնում են, որ Զարուհի Փոստանջյանը շրջել է մետրոպոլիտենի Գարեգին Նժդեհ կայարանի հարակից տարածքներում, որտեղ աշխատող կրպակատերերը, փողոցային առևտրով զբաղվողները և անցորդները ողջունել և հաղթանակ են մաղթել «Երկիր Ծիրանի»-ի նախագահին:

Զարուհի Փոստանջյանը համայնքի կենտրոնական և հարակից փողոցներով, բակերով ու շուկաներով քայլել և քաղաքացիներին ներկայացրել է կուսակցության նախընտրական ծրագրի հիմնադրույթները, «Արդարություն և օրենք» կարգախոսը՝ վստահեցնելով, որ գալիս է ծառայելու Երևանին և երևանցիներին: Նա պատասխանել է բազմաթիվ քաղաքացիների հարցերին, որոնք հիմնականում վերաբերում էին աղբահանության, տրանսպորտի, առողջապահության, սոցիալական խնդիրներին և աշխատատեղերի ստեղծմանը:

Այնուհետև Զարուհի Փոստանջյանը քարոզչական խմբի հետ եղել է «Կարմիր բլուր» հնավայրում, որտեղից ուղերձ է հղվել հանրությանը, որ քաղաքապետ ընտրվելու պարագայում Զարուհի Փոստանջյանը լիովին կօգտագործի ինչպես մյուս մշակութային օջախների, այնպես էլ «Կարմիր բլուր» հնավայրի ներուժը, որը կդառնա թե՛ գիտական ու կրթական, և թե՛ մշակութային ու զբոսաշրջության կենտրոն:

Ըստ նրա՝ զբոսաշրջության և մշակութային կարևոր հանգրվան կարող է լինել նաև Հրազդան գետի ժայռերի ստորոտով և երկայնքով կառուցված Ումեշինի ջրանցքը և հարակից տարածքները: Ջրանցքը կառուցվել է ուրարտական Ռուսա Բ արքայի կողմից: Այն կարևոր կենսական նշանակություն է ունեցել՝ ոռոգել է տարածքի դաշտերն ու այգիները և ջուր է մատակակարել Թեյշեբաինի ամրոցին: Ջրանցքն օգտագործվել է նաև խորհրդային տարիներին, կառուցապատումներն այժմ էլ տեսանելի են: Ջրանցքը ներկայումս բավական վատ վիճակում է, վերածվել է աղբավայրի, մինչդեռ առկա են կարևոր լանդշաֆտ և քարանձավներ, որոնք կարող են պատմահնագիտական կարևոր արժեք և բացահայտումներ ունենալ:

Այնուհետև Զարուհի Փոստանջյանը ներկայացնելով Հրազդանի կիրճի տեսարանը, որն աղբավայր է հիշեցնում, առկա են աղբի մեծ կուտակումներ՝ նշել է, որ քաղաքապետի լիազորություններ ստանձնելիս նաև այս աղբակույտերն է վերացնելու, իսկ բնության հրաշալի վայր հանդիսացող Հրազդանի կիրճը պետք է պահպանել, այլ ոչ՝ վայրագ կառուցապատման և աղտոտման միջոցով վերացնել:

Շարունակելով քարոզարշավը Շենգավիթ վարչական շրջանում՝ Երևանի քաղաքապետի թեկնածու Զարուհի Փոստանջյանը եղել է Չարբախի փոս, Նորագավիթ և Աէրացիա թաղամասերում: Շրջելով բոլոր փողոցներով և բակերով՝ «Երկիր Ծիրանի»-ի նախագահը ջերմ ու անկեղծ զրույցի է բռնվել  քաղաքացիների հետ և ներկայացրել  իր անելիքները՝ քաղաքապետի լիազորություններ ստանձնելիս: Հատկապես կարևորվում էր Երևան քաղաքի բյուջեի նպատակային ծախսումը և բաց ու թափանցիկ կառավարման հանրային ինստիտուտի ներդնումը:

Ընդհանուր առմամբ՝ Երևանի քաղաքապետի թեկնածուն այսօր շուրջ 6 ժամ շրջել է Երևանի ամենամեծ վարչական շրջան հանդիսացող Շենգավիթ համայնքում և զրուցել հարյուրավոր քաղաքացիների հետ, որոնց բոլորին ներկայացվել և բաժանվել են կուսակցության քարոզչական նյութերը: