Ձեր վստահելի աղբյուրը

«Մեր հիմնական ուղերձը քաղաքացիներին հետևյալն է՝ ազատ ընտրեք»,- այս մասին այսօր Աջափնյակ համայնքում լրագրողների հետ զրույցում ասաց  «Ժառանգություն» կուսակցության  քաղաքապետի թեկնածու Րաֆֆի Հովհաննիսյանը՝ պատասխանելով հարցին, թե որ է «Ժառանգություն» կուսակցության հիմնական ուղերձը քաղաքացիներին: 

«Մենք հարգում ենք բոլորին, անգամ նրանց, որոնց հետ համաձայն չենք: Քաղաքացին պետք է ընտրի որևէ մեկին, այդ թվում՝ նաև մեզ: Խնդրում եմ՝ բացառապես չընտրեք մեզ, երևանցինե՛ր, ազատ ընտրեք, որովհետև սեպետմբերի 23-ին լավ, թե վատ, մենք ունենալու ենք մեր ընտրած քաղաքապետն ու ավագանին»,- հավելեց նա:

Րաֆֆի Հովհաննիսյանի խոսքով՝ առաջին անգամ Երևանի նոր ավագանին պետք է քաղաքացու առաջ հաշվետու,  պատասխանատու լինի:

«Ինձ համար կարևորն այն է, որ ես մանսակցելու եմ մի ընտրության, որն ունենալու է լեգիտիմ քաղաքապետ և ավագանի: Դա է ամենամեծ հաղթանակը: Ես՝ որպես քաղաքացի, արդեն հաղթել եմ՝ անկախ նրանից, թե ես ում կքվեարկեմ կամ քաղաքացիները ում կնախընտրեն: Մենք հարգում ենք բոլորին և անկախ արդյունքից մենք մեր ձեռքը պետք է մեկնենք հետընտրական շրջանում բոլոր կուսակցություններին, որովհետև մեզ պետք չեն սև ու սպիտակ, կանաչ կամ երկնագույն: Մեզ պետք է ամբողջական  տարապատկերը գույների և մենք պետք է ունենանք միասնական կառավարում , քանի որ կա մեկ Երևան, մեկ Հայաստան»,- ասաց «Ժառանգության» քաղաքապետի թեկնածուն:

Լրագրողները հետաքրքրվեցին՝ ծանոթ է նա երևանցիների խնդիրներին,  Րաֆիի Հովհաննիսյանն ասաց, որ քիչ թե շատ  ծանոթ է, այդ խնդիրները ներառված են իրենց ծրագրում: Կարևորն, ըստ նրա այն է, որ Երևանի բոլոր խնդիրները գույքագրվեն:

«Եթե  մեր համաքաղաքացիների մեծամասնությունն ինձ պատիվ անի և համարի, որ ես պետք է լինեմ մեր հրաշալի քաղաքի հանրային ծառայողներից մեկը, առաջին օրը ես մեկ ծառ կտնկեմ, մեկ վերելակ կվերանորոգեմ, մեկ-մեկ-մեկով կգնամ: Հետո կհրավիրեմ համահայկական խորհուրդ, որը կներկայացնի առկա բոլոր խնդիրները՝ կրթությունից մինչև առողջապահություն, մշակույթից մինչև բարձր տեխնոլոգիաներ ու այդպես կաշխատենք»,- ընդգծեց Րաֆիի Հովհաննիսյանը: