Ձեր վստահելի աղբյուրը

«Տրանսպորտի խնդիրը քաղաքական հիմք չունի,  քաղաքային խնդիր է, ով էլ լինի իշխանության, պետք է լուծումներ տրվեն»,- «Երևան հասարակական տրասնպորտի ճգնաժամը. ինչպե՞ս են տեսնում հարցի լուծումը քաղաքական ուժերը» թեմայով քննարկմանն ասաց Երևանի  ավագանու Հայ Յեղափոխական Դաշնակցություն կուսակցության թեկնածու Արթուր Եղիազարյանը։

Նրա խոսքով, Հայաստանը դեռևս սոցիալապես անապահով երկիր է համարվում, սրանից ելնով Երևանում տրանսպորտային հագեցվածությունը դեռևս մինչև 4 անգամ կարող է ավելանալ։ 
«Սա նշանակում է, որ ապագայում ավելի լուրջ խնդիրներ են սպասվում, այսօրվանից լուծումներ պետք է գտնել»,- հավելեց Ա. Եղիազարյանը։

Նա նշեց, որ պետք է ստեղծել Երևանը շրջանցող ճանապարհներ, ձևավորվի միասնական տրանսպորտային համակարգ, գծերը պետք է վերացվեն, ավելացվեն էստակադաները։   ՀՅԴ-ական գործչի խոսքով, մետրոպոլիտենը տրանսպորտային ամենալավ տարբերակն է, բայց  ամենաթանկն է ստեղծելու առումով, իրատեսական չեն խոստումները, որ առաջիկա հինգ տարիներին կստեղծվի մի քանի կայարաններ։

«Մեր ծրագրով հաշվարկել ենք Աջափնյակի կիսակառույց կայարանի գործարկումը»,- ասաց Ա. Եղիազարյանը։

Նա նաև նշեց, որ տրանսպորտը պետք է հարմար լինի քաղաքացիների համար. «Կարող է լինել լրացուցիչ ծառայություններ մառուցող տրանսպորտ, որը մի քիչ թանկ լինի, և սովորական։ Այսինքն այլընտրանք լինի»։

Քննարկմանը ներկա Երևանի ավագանու «Ժառանգություն» կուսակցության թեկնածու Հովսեփ Խուրշուդյանն ասաց, որ ընտրություններին մասնակցող քաղաքական ուժերի ծրագրերում բավականին շատ կետեր կան, որոնք ընդհանուր են, ինչը նշանակում է, որ ավագանին ինչ կազմով էլ ձևավորվի, այս հիմնական խնդիրները բոլորի համար տեսանելի են, միասնական լուծում այս կամ այն կերպ տալու են։

Նա նշեց, որ համաձայն են միասնական տրանսպորտային համակարգի ձևավորմանը, մետրոյի կայարանների ավելացմանը։ Հ. Խուրշուդյանն ասաց, որ շրջանցող ճանապարհները կարող են լինել մի քանիսը, որոնք կլուծեն էլոկոգիական խնդիր, խցանումների հարցը։

Ավագանու թեկնածուն նշեց, որ պետք է նվազեցվեն «կարմիր գծերի» վճարները, իրավական առումով կարգավորվեն, քանի որ այսօրվա դրությամբ թերի են, մարդիկ դժգոհ են կարգավորումներից։

Հ. Խուրշուդյանն ասաց, որ իրենց ծրագրում կա էլեկտրական տրանսպորտի խթանմանն ուղղված կետ, ցանկալի է բոլոր տեսակի հարկերից ազատում։ Նրա խոսքով, դա նույնպես կլուծի էկոլոգիական խնդիր։

Նա կարևորեց ավտոկայանատեղիների խնդրի լուծումը. լինեն բարձրահարկ կամ ստորգետնյա, էլիտար շենք կառուցողներին ստիպել իրենց շենքի բնակիչների համար ստորգետնյա կայանատեղիների կառուցել։

Հ. Խուրշուդյանն ասաց, որ վերջնականապես պետք է լուծվի աջ ղեկով մեքենաների խնդիրը, որպեսզի մարդիկ կարողանան ազատ ներկրել, օգտագործել, որևէ սահմանափակում չպետք է լինի։

Երևանի ավագանու «Իմ քայլը» դաշինքի թեկնածու Հրաչ Սարգսյանի խոսքով, տրանսպորտային հարցի լուծումը տեսնում են Երևանի քաղաքապետարանի կողմից պատվիրված 850 հազար դոլար ծրագրի շրջանակում, որի կազմմանը մասնակցել էին տարբեր փորձագետներ։

«Մեր ուսումնասիրության արդյունքում որոշ առաջարկներ կան, բայց, ընդհանուր առմամբ, այն մատուցումը, որ կիրառվել է, ընդունելի է»,- ասաց նա։

Քննարկմանը ներկա Երևանի ավագանու «Երկիր Ծիրանի» կուսակցության թեկնածու Տիգրան Պողոսյանը նշեց, որ իրենց ծրագրով առաջարկվում է ամբողջ ցանցային համակագը փոխվել՝ մետրո, տրոլեյբուս, ավտոբուս: Նա ասաց, որ վճարման համակարգը լինի քարտային, չպետք է գերազանցի 100 դրամը, լինելու են զեղչեր ուսանողների, զինծառայողների ընտանիքների համար, հաշմանդամների, կարգ ունեցող թոշակառուների համար երթուղիները լինելու են անվճար։
Տիգրան Պողոսյանի խոսքով,  տրանսպորտը լինելու է համայնքային. այսինքն ստեղծվելու է բաց բաժնետիրական ընկերություն, որի 51 տոկոս բաժնետերը լինելու է քաղաքապետարանը, վերահսկելու է ամբողջ գործընթացը,  սպասարկումը։