Ձեր վստահելի աղբյուրը

«ՔԿՀ-ներում պատժի համակարգը՝ մասնավորապես պրոբացիայի մասով, շատ մեծ ներգրավածություն է պահանջում: Առավել կարևոր է ՏԻՄ-երի հետ համագործակցությունը, որպեսզի համայնքը, որտեղ վերադառնում է  պատիժը կրած անձը, կարողանա աջակցել այդ անձի վերաինտեգրմանը և վերասոցիալականացմանը: Սա մեր հիմնական ուղղությունն է»,- ՔԿՀ-ներում ամենահրատապ հարցերի վերաբերյալ նպատակային հայեցակարգի մշակման շուրջ այսօր կայացած քննարկման ժամանակ ասաց ՀՀ արդարադատության փոխնախարար Սուրեն Քրմոյանը:

Միջոցառմանը ներկա Միջազգային իրավական համագործակցության գերմանական հիմնադրամի (IRZ) ծրագրերի մենեջեր Ամալիա Վուքերթն իր հերթին տեղեկացրեց, որ իրենց գործընկերներ են  շուրջ երեսուն երկրներ:

«Հիմնադրամը շատ մեծ չէ, մենք վաթսուն  աշխատակից ունենք: Հայաստանում 2011 թվականից ենք աշխատում, այն ժամանակ երկու երկրների Արդարադատությունների նախարարությունների միջև համաձայնագիր է կնքվել, որի շրջանակներում էլ շարունակում ենք աշխատել: Ես ուրախ եմ, որ այս միջոցառումը մեր համագործակցության արդյունավետ շարունակությունն է: Հույս ունեմ, որ մինչև տարեվերջ մի քանի ՔԿՀ-ներում աշխատելու հնարավորություն կունենանք»,- ասաց նա:

Փորձագետ, Գերմանիայի Քարլսռուհեի ՔԿՀ-ի ղեկավար Թոմաս Միլլերն էլ նշեց, որ իրենք խիստ մտահոգ էին հետևում ապրիլ-մայիս ամիսներին Հայաստանում տեղի ունեցած հայտնի իրադարձություններին, սակայն ընթացքում համոզվեցին, որ ժողովրդավարությունը գործում է: «Ձեզ համար մեծ ձեռքբերում է, որ իրավիճակը հանգուցալուծվեց առանց արյուն հեղելու: Եվրոպական շատ երկրների համար սա լավ օրինակ է: Կարծում եմ՝ աշխատանքները ճիշտ ուղու վրա են»,- ասաց նա:

Գերմանացի մասնագետի հավաստմամբ, բանտային համակարգում փոփոխությունները կարևոր է ոչ միայն օրենքում ամրագրել, այլ բանտային համակարգում աշխատողների ուղեղներում:

«Նրանք են, որ փոփոխությունները պետք է կյանքի կոչեն: Անհրաժեշտ է աշխատակիցներին ոչ թե հրահանգել, այլ համոզել, որ դա կարևոր է: Միայն այդ դեպքում աշխատանքը կարող է հաջողության բերել: Ամեն ինչ սկսում է առաջին քայլից: Դատապարտյալների հետ պետք է աշխատել այնպես, որ ռիսկերը հնարավորինս կրճատվեն, որպեսզի ազատության մեջ հայտնվելով՝ նրանք ռումբի նման չպայթեն:

Ինչպես բանտային աշխատակիցները վարվեն նրանց հետ, նույնպիսի վարք ազատության մեջ հայտնված դատապարտյալներն իրենց կդրսևորեն: ՔԿՀ-ներում պետք է հայտնվեն միայն այն մարդիկ, ովքեր իսկապես պետք է հայտնվեն: Գերմանիայում մարդկանց բանտարկում են միայն խիստ անհրաժեշտության դեպքում, մյուս դեպքում կիրառվում են օրենքով սահմանված տուգանքներ: Մենք մեր հայ  գործընկերներին խնդրելու ենք ընթացակարգեր մշակել՝ մեր քննարկումները կյանքի կոչելու համար: Սա է լինելու տնային առաջադրանքը»,- ասաց նա:

Գերմանացի մյուս փորձագետ Հայնց Բրյուխեն իր հերթին անդրադարձավ դատապարտյալներին խրախուսելու մեխանիզմներին՝ խորհուրդ տալով շեշտը դնել անձի անհատական որակները գովելու, յուրաքանչյուր բանտարկյալի «թասիբի գցելու» վրա:

Թոմաս Միլլերն էլ նշեց, որ Գերմանիայում բանտային պայմաններում պահվող անձանց հնարավորություն է տրվում աշխատել, սեփական գումարը վաստակել՝ մոտիվացնելով թեկուզ լրացուցիչ տուփ ծխախոտ կամ սուրճ գնել: