Ձեր վստահելի աղբյուրը

Երևանի Արամի 23 հասցեում գտնվող  պատմամշակութային հուշարձանն անհրաժեշտ է հրատապ փրկել: Ահազանգում է «Հայաստանի փոքրիկ երգիչներ» երգչախումբը։ Հենց այդ շենքում երգչախումբն անցկացվում է իր փորձերը։ 

«Վերջին մի քանի ամիսների ընթացքում Արամի 23 հասցեում գտնվող շենքի հարևանությամբ՝ Տերյան փողոցի հատվածում, փորվել է մեծ փոսորակ և կատարվում է շինարարություն: Շինարարական նորմերի ու կանոնների դրույթների պահանջների կոպիտ խախտման հետևանքով պատմամշակութային հուշարձան շենքը խարխլվել է և դարձել 4-րդ կարգի վթարային:

Մասնագետների պնդմամբ պատմամշակութային հուշարձան շենքը գտնվում է ծայրահեղ վիճակում և ամեն օր սպառնում է փլուզման վտանգ: Բոլոր շահագրգիռ և պատասխանատու կառույցները (ՀՀ վարչապետի վերահսկողական ծառայություն, ՀՀ Արտակարգ իրավիճակների նախարարություն, ՀՀ Մշակույթի նախարարություն, Երևանի քաղաքապետարան, ՀՀ քաղաքաշինական կոմիտե) խնդրին տեղյակ են: ԱԻՆ-ը արգելել է շարունակել աշխատանքը շենքում: Անհրաժեշտ է հրատապ փրկել շենքը:

Ակցիան տեղի կունենա սեպտեմբերի 15-ին, ժամը 16:30-ին, Արամի 23 հասցեում»,- նշված է «Հայաստանի փոքրիկ երգիչներ» երգչախմբի ֆեյսբուքյան էջում:

Հիշեցնենք՝ օրեր առաջ ՀՀ քաղաքաշինության կոմիտեից հայտնել էին, որ «Հին Երևան» թաղամասի մի հատվածում՝ ստորգետնյա ավտոկայանատեղիի և հասարակական սպասարկման տարածքի շինարարական աշխատանքները վտանգել են Արամի 23 հասցեում՝ պատմամշակութային հուշարձան հանդիսացող շենքը: Կառույցը փլուզման եզրին է:

Լուսնկարները՝ «Հայաստանի փոքրիկ երգիչներ» երգչախմբի ֆեյսբուքյան էջից։