Ձեր վստահելի աղբյուրը

«Ամեն անգամ, երբ ինչ-որ խնդիր է առաջանում Հատուկ քննչական ծառայության կամ ԱԱԾ-ի , կամ իրավապահ այլ մարմնի գործունեության հետ կապված, խնդրից մարդկանց ուշադրությունը շեղելու համար ինչ-որ նոր գործ է անընդհատ հայտնվում»,-լրագրողների հետ հանդիպմանն այսպես արձագանքեց ՀՀ երկրորդ նախագահ Ռոբերտ Քոչարյանի պաշտպաններից Արամ Օրբելյանը՝ Քոչարյանի նկատմամբ փողերի լվացման հատկանիշներով հարուցված քրեական գործի վերաբերյալ հարցին։

Փաստաբանը հիշեցեց, որ Ռոբերտ Քոչարյանը «Կոնգրես» հյուրանոցը, որի մասին խոսել էր ԱԱԾ տնօրենը վերջին ասուլիսում, գնել է 2014 թվականին, երբ և Ռոբերտ Քոչարյանը, և նրա ընտանիքի անդամները  վաղուց պետական պաշտոն չէին զբաղեցնում։

«Երբ կլինի գործը, երբ կիմանանք, թե դա ինչ կաշառք է, ո՞վ է ում տվել, այդ ժամանակ ավելի մանրամասն կներկայացնենք։ Բայց այդ գործարքի հետ կապված կաշառքի որևէ էպիզոդ մենք չենք տեսնում։ Եթե խոսքը վերաբերվեր 2006, 2007 կամ էլ 2000 թվականին... Խոսքն այստեղ վերաբերում է 2014 թվականի գործարքին, մենք էլ ենք զարմացած, սպասում ենք, տեսնենք, թե ինչ հետագա զարգացում կունենա»,-հայտարարեց Արամ Օրբելյանը։

Հիշեցնենք, որ ԱԱԾ տնօրեն Արթուր Վանեցյանը ՀՔԾ պետի հետ համատեղ ասուլիսում հայտարարեց. «Քոչարյանի ընտանիքի ունեցվածքի մասին կխոսեմ փաստերով, թե ով ինչ է ձեռք բերել։ Ոնց է ձեռք բերել «Կոնգրես» հյուրանոցը  6 մլն դոլար կաշառք վերցնելու արդյունքում և մնացած այլ, այլ ունեցվածքները։ Ունենք ցուցմունք, ունենք հիմնավոր ապացույցներ, ունենք մի սխեմա, որտեղ հստակ երևում է, թե ոնց է գալիս ու Քոչարյանի ընտանիքը դառնում սեփականատեր։ Ունենք գումարի սկզբնաղբյուրը, թե որտեղից այդ գումարն ի հայտ եկավ, և ունենք, թե ոնց այդ գումարը փոխանցվեց Քոչարյանի ընտանիքին։ Արդեն իսկ հարուցվել է քրեական գործ մեկ շաբաթ-10 օր առաջ, փողերի լվացման հատկանիշներով, խոսքը հարյուր միլիոնավոր դոլարների մասին»։