Ձեր վստահելի աղբյուրը

«Քարոզարշավի այս մի քանի օրերը շատ դրական եմ գնահատում։ Մեր մասով կարող եմ ասել, որ շատ գոհ ենք, շատ դրական է, մարդկանց արձագանքը շատ լավն է, մարդիկ հույսով են լցված»,- Երևանի Նուբարաշեն վարչական շրջանում նախընտրական քարոզարշավի ժամանակ լրագրողների հետ զրույցում այսօր ասաց ՔՊ-ի քաղաքապետի թեկնածու Հայկ Մարությանը։

Որպես մայրաքաղաքի գլխավոր խնդիրներից մեկը՝ նա առանձնացրեց աղբահանության վիճակը, որը, Մարությանի խոսքով, Երևանի բոլոր վարչական շրջաններում նույնն է։ 

«Լուծումները լինելու են համակարգային, չեն լինելու տեղային։ Մոտեցումը համակարգային պետք է լինի, միայն այդ դեպքում ամբողջ քաղաքը կսկսի համաչափ զարգանալ»,- ասաց քաղաքապետի թեկնածուն։

Հարցին՝ բացառո՞ւմ է, որ քաղաքապետ ընտրվելու դեպքում կզբաղվի դերասանական կարիերայով, ՔՊ անդամը պատասխանեց՝ քաղաքապետի պաշտոնը 5 տարով է, իսկ իր կյանքը 5 տարով չի ավարտվում։

«Օրենքն ինձ թույլ է տալիս զբաղվեմ, բայց չեմ կարծում, որ ժամանակ ունենամ»,- ասաց նա։

Լրագրողները Հայկ Մարությանից նաև հետաքրքրվեցին՝ քարոզարշավի մի քանի օրերի ընթացքում իր համար բացահայտե՞ց խնդիրներ,  որոնց մասին մինչ այժմ չգիտեր։ Ի պատասխան՝ քաղաքապետի թեկնածուն նշեց՝ իրենց ծրագիրը թիրախային է, այն ինչ կատարվում է երևանյան մի բակում, կատարվում է նաև երևանյան մյուս բակերում։

«Մենք ունենք քաղաքական կամք, մյուսները վստահաբար չունեին, որովհետև այնպիսի խնդիրներ են օդում մնացել, որոնք 100 տոկոսով հնարավոր էր լուծել, միշտ շահերի բախում է եղել։ Մենք մեզ կապող, բռնող հանգամանք չունենք, մեր ձեռքերն ազատ են, մենք ոչ մեկից կախում չունենք, որ Երևանի խնդիրները քայլ առ քայլ սկսենք շտկել»,- ամփոփեց Հայկ Մարությանը։