Ձեր վստահելի աղբյուրը

Ապրիլյան պատերազմի հերոս Արմենակ Ուրֆանյանի անվան հիմնադրամ կստեղծվի։ Այս մասին այսօր ՀՀ վարչապետի տիկին Աննա Հակոբյանի հետ հանդիպմանը հայտնեց կապտիան Ուրֆանյանի մայրը՝ տիկին Համեստը։

«Սրբացած մեր տղաների հիշատակը հավերժ խոնարհումով պահելու համար հիմնել եմ հերոս որդուս՝ Արմեն Ուրֆանյանի անվան բարեգործական հիմնադրամը, որի խորհրդանիշ պատկերն աղավնիներն  են՝ ի նշան խաղաղության ավետիս»,- ասաց նա։

Տիկին Համեստը հայտնեց, որ հիմնադրամի միջոցները ուղղվելու են ապրիլյան պատերազմում զոհված տղաների ընտանիքներին։

«Նաև նպատակ ունեմ հիմնել որդուս տուն-թանգարանը։ Նա միշտ երազում էիր իր սեփական տունը կառուցել ու ապրել իր ընտանիքով, որդուս կիսատ մնացած երազանքն եմ փորձում ինչ-որ կերպ իրականացնել»,- նշեց նա։

Նա հայտնեց, որ ֆոնդի միջոցով նաև կանաչապատման աշխատանքներ կարվեն Եռաբլուրում։
Աննա Հակոբյանն էլ թե նախկին ու ներկա պաշտոնյանիների, թե օլիգարխների կանանց կոչ արեց իրենց ներդրումն ունենալ այս հիմնադրամում։

«Բոլորովին վերջերս հրապարակային բանավեճ եմ ունեցել հանրության հետ,  բրենդային զարդերի ու հագուստների հետ կապված։ Կոչ եմ անում բոլոր նրանց, ովքեր մի փոքր անգամ կասկածում են այն արդար ճանապարհի  վրա, որի շնորհիվ ունեցել են այդ արժեքավոր իրերը, թեկուզ դրանց մի մասը նվիրաբերել տիկին Համեստի ֆոնդին և թափ հաղորդել ֆոնդի աշխատանքներին»,- նշեց Աննա Հակոբյանը։