Ձեր վստահելի աղբյուրը

Արցախի  իշխանությունները մշտապես բարձր են գնահատել «Հայաստան» համահայկական հիմնադրամի գործունեությունը և վերջինիս հետ ունեցած համագործակցության մակարդակը։ Այս մասին հայտարարել է Արցախի Հանրապետության պետական նախարար Գրիգորի Մարտիրոսյանը հիմնադրամի մի խումբ ներկայացուցիչների հետ հանդիպմանը։

Նախարարի խոսքով՝ երկու տարի առաջ համահայկական միջոցներով շահագործման հանձնված Վարդենիս-Մարտակերտ մայրուղին տնտեսական առումով լուրջ արդյունքներ է ապահովում՝ մասնավորապես խթանելով զբոսաշրջության և ապրանքաշրջանառության աճին:

«Բացի բազմաթիվ իրականացված ծրագրերից, Հիմնադրամի միջոցով մեր շատ հայրենակիցներ առիթ են ունեցել հայրենիքի հետ ավելի ամուր կապեր հաստատելու: Այս իմաստով, այն իսկապես, յուրօրինակ կամուրջ է դարձել Հայրենիք-Սփյուռք հարաբերություններում, և, համոզված ենք, որ տարիների ընթացքում համատեղ աշխատանքով ձեռք բերված փորձն ու վստահությունը նոր որակ կստանան մեր ապագա հարաբերություններում»,- ասել է Գ. Մարտիրոսյանը:

Հանդիպման վերջում Գ. Մարտիրոսյանը պատասխանել է նաև Հիմնադրամի շահառուների հարցերին: