Ձեր վստահելի աղբյուրը

Թուրքիայի նախագահ Ռեջեփ Թայիփ Էրդողանի՝ ՀՀ վարչապետ Նիկոլ Փաշինյանին զանգահարելու մասին լուրը չի համապատասխանում տեղեկատվությանը։

«Նման հեռախոսազրույց չի եղել»,-Panorama.am-ին հայտնեց ԱԳՆ խոսնակ Տիգրան Բալայանը։

«Էրմենիհաբեր»-ի փոխանցմամբ,  Թուրքիայի նախագահ Ռեջեփ Թայիփ Էրդողանը զանգահարել է Հայաստանի վարչապետ Նիկոլ Փաշինյանին։ Ըստ հրապարակումների՝ Էրդողանը զանգահարել է՝ խնդրելով ազատ արձակել հուլիսի 24-ին հայ-թուրքական սահմանը հատած և կալանավորված Թուրքիայի քաղաքացի 16-ամյա Ումութ Ալի Օզմենին։

Գործին Էրդողանի ներգրավվածության մասին տեղեկացրել է Ումութ Ալիի հայրը Մուստաֆա Օզմենը։ Նա պատմել է իր և Էրդողանի գլխավոր խորհրդական Մեհմեթ Ուչումի հեռախոսազրույցի մանրամասները․ «Մեր նախագահը լուրն իմանալով զանգահարել է Հայաստանի վարչապետին և ասել «Այս երեխային վերադարձրեք»։ Նա էլ (նկատի ունի ՀՀ վարչապետին) զանգել է իր ԱԳՆ և տեղեկություն պահանջել, ապա հետ է զանգահարել մեր նախագահին և դրական պատասխան տվել։ Պարոն Ուչումն ինձ ասաց, որ երեխաս մինչև երկուշաբթի կամ երեքշաբթի Թուրքիայում կլինի»։

Ըստ հրապարակումների՝ այդ ընթացքում Ումութ Ալիի հարցով Թուրքիայի մեջլիսի նախկին պատգամավոր Ուֆուք Ուրասը դիմել է Հայաստանի իշխանություններին մոտ կանգնած անձանց։ Նշվում է, որ նա խոսել է Հայաստանում հայ-թուրքական հարաբերությունների կարգավորման համար աշխատանքներ իրականացնող «Վերադարձ» հիմնադրամի նախագահ Արագած Ախոյանի հետ։ Ուրասը հայտնել է, որ «Ախոյանն այսօր այցելելու է բանտ՝ տեսակցելու Ումութ Ալիին»։

Թուրքական մամուլում լուրեր են շրջանառվում, որ Ումութ Ալի Օզմենին արդեն հանձնել են Վրաստանում Թուրքիայի գլխավոր հյուպատոսությանը։ Մուստաֆա Օզմենը, չի հաստատել այդ լուրը, քանի որ կապ չի կարողացել հաստատել տղայի  հետ։