Ձեր վստահելի աղբյուրը

«ԲՀԿ-ն չի սկսել սև PR իրականացնել։ Այս ամենը եղել է արձագանք օրեր շարունակ սոցիալական ցանցերում, կայքերում կոնկրետ տեղեկատվական ռեկետի, տեղեկատվական տեռորի արձագանք, որի կուլմինացիան եղել է երեկ՝ հանրահավաքի ժամանակ հնչած ելույթին։ Օրեր շարունակ մարդկանց ինստագրամում, ֆեյսբուքում  ուղարկվել են անձնական մեսիջներ, կոչեր՝ չընտրել Նաիրա Զոհրաբյանին»,- այսօր ԱԺ ճեպազրույցների ժամանակ ասաց «Ծառուկյան դաշինք» խմբակցության պատգամավոր Իվետա Տոնոյանը։

«Երբ այս իրավիճակը շարունակվում է օրեր շարունակ, բնական է, որ ինչ-որ պահի այս ամենը պետք է արձագանք ունենա։ Ինչ վերաբերում է ունեցած փաստերին, մեր ձեռքի տակ եղած բազմաթիվ փաստերն առաջիկայում պատրաստվում ենք ներկայացնել եվրոպական կառույցներին, մասնավորապես, Եվրոպայի խորհրդի  մարդու իրավունքների հանձնակատար Դունյա Միյատովիչին, ով այս օրերին գտնվում է Հայաստանում։ 

Այն, ինչ տեղի է ունենում, դուրս է տրամաբանության բոլոր սահմաններից։ Ամենակոպիտ վիրավորական ձևակերպումներով՝ թեկնածուի, նրա մտերիմների, ազգականների հասցեին, և այս ամենն իրականացվում է պետական նախարարությունների աշխատակիցների ֆեյքերի կողմից։ Բազմաթիվ նախարարությունների աշխատակիցներ իրենց անձնական էջերում համատարած ատելություն և ագրեսիա են տարածում Նաիրա Զոհրաբյանի հասցեին։ Այդ մարդկանց ֆեյսբուքյան էջերի մոնիտորինգը ցույց  է տալիս, թե հետևողականորեն ինչ գիծ է տարվում»,- ասաց պատգամավորը։

Խմբակցության քարտուղար Վահե Էնֆիաջյանն  իր հերթին հիշեցրեց, որ դեռ քարոզարշավի մեկնարկից առաջ իրենց քաղաքական ուժը հայտարարություն տարածեց՝ հույս հայտնելով, որ նոր Հայաստանում նոր որակի քարոզարշավ կծավալվի։

«Անձնական վիրավորանքների տիրույթում գտնվող գործընթացները, քաղաքական ուժերի՝ միմյաց հակադրվելու և առճակատման միտումները մեզ համար ամենաանցանկալի մոտեցումներն են։ Բայց գտնում ենք, որ քաղաքական հարթակում ամեն ինչ պետք է լինի տրամաբանված, ցենզուրայի և կուլտուրայի շրջանակներում»,- ասաց նա։