Վիկտոր Համբարձումյանի ծննդյան և Հայաստանում աստղագիտության օրն է

Հասարակություն 10:00 18/09/2018 Հայաստան

Վիկտոր Համբարձումյանի ծննդյան և Հայաստանում աստղագիտության օրն է

Տես նաև`«Առանց մեծերի դժվար է, առանց հույսի՝ անհնար»… Վիկտոր Համբարձումյան (լուսանկարներ)

Սեպտեմբերի 18-ը հայ մեծանուն գիտնական Վիկտոր Համբարձումյանի ծննդյան օրն է, որը` սկսած 2009թ., Հայաստանում նշվում է նաև որպես աստղագիտության օր։

Վիկտոր Համբարձումյանը (1908-1996) XX դարի խոշորագույն գիտնականներից մեկն էր: Նա հիմնարար ներդրում ունի աստղագիտության և աստղաֆիզիկայի, տիեզերածնության, տեսական ֆիզիկայի, մաթեմատիկայի և փիլիսոփայության ամենատարբեր ոլորտներում:

Բյուրականի աստղադիտարանից մանրամասնում են, Համբարձումյանն ավելի քան 700 հոդվածների և 20-ից ավելի գրքերի հեղինակ է: Առավել հայտնի է տարրական մասնիկների ֆիզիկայի, մոլորակային միգամածությունների տեսության, աստղային դինամիկայի, Գալակտիկայի տարիքի որոշման, ճառագայթման տեղափոխման տեսության, աստղասփյուռների, ակտիվ գալակտիկական միջուկների, գերխիտ աստղերի, բռնկվող և այլ անկայուն աստղերի վերաբերյալ կատարած աշխատանքներով և հայտնագործություններով: Նա նաև գիտության խոշոր կազմակերպիչ էր, կարևոր քաղաքական և հասարակական գործիչ:

Նա հիմնադրել և ղեկավարել է Բյուրականի աստղադիտարանը 1946-1988թթ., եղել է Հայաստանի գիտությունների ակադեմիայի պրեզիդենտ 1947-1993թթ., Միջազգային աստղագիտական միության (ՄԱՄ) պրեզիդենտ 1961-1964թթ. և Գիտական միությունների միջազգային խորհրդի պրեզիդենտ 1968-1972թթ.:

Համբարձումյանը ԽՍՀՄ և ՀՀ ազգային հերոս էր, 28 ակադեմիաների անդամ, 7 համալսարանների պատվավոր դոկտոր, արժանացել է բազմաթիվ պետական և գիտական մրցանակների, շքանշանների և մեդալների:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: