Ձեր վստահելի աղբյուրը

«Քարոզարշավը սկսվեց շատ նորմալ ընթացքով: Մենք, հույս ունեինք, որ այն պետք է անցնի ազատ, անկախ, առանց ընտրակաշառքի և առանց վարչական լծակների ներազդման, սակայն քարոզարշավը վերածվում է քաղաքական լուրջ պայքարի: Երևանի խնդիրները դարձել են մանրադրամ»,- այսօր տեղի ունեցած մամուլի ասուլիսի ժամանակ ասաց ՀՅԴ ցուցակում ընդգրկված Դավիթ Հակոբյանը:

«Երևանն անընդմեջ խնդիրներ և այդ խնդիրների լուծումներ պետք է ունենա: ՀՅԴ-ն իր թիմով ի վիճակի է Երևանն էլ ավելի ճիշտ և թափանցիկ կառավարել, ծախսերն ուղղորդել ճիշտ հունով՝ լուծելով վերելակների, տանիքների, ոռոգման և մյուս խնդիրները: Բայց աստղաբաշխական գումարների խոստումներ չենք կարող տալ, որովհետև այդ ֆինանսները չկան»,- ասաց նա:

Դավիթ Հակոբյանը նաև նշեց, որ շատերը մտածում են մանկապարտեզների բայց ոչ՝ ծերերի օթևանների մասին, ինչը, նրա խոսքով, ևս խնդիր է:

Անդրադառնալով «հասարակությանը սևերի և սպիտակների բաժանելու, որոշ անձանց «ասֆալտին փռելու» պրակտիկային»՝ Դավիթ Հակոբյանը հասարակության բևեռացումն անթույլատրելի համարեց՝ շեշտելով, որ ընտրությունների ավարտից հետո մայրաքաղաքը շարունակելու է ապրել իր կյանքով, ընտրություններին մասնակից ուժերի ներկայացուցիչները շարունակելու են բարևել միմյանց:

«Ես ուզում եմ, որ մենք վազն անցնենք  այդ ամենից: Հայաստանում չպետք է թշնամանք սերմանել»,- ասաց նա:

Դաշնակցական գործիչն ընդգծեց, որ հանրային գերակա շահի անվան տակ մայրաքաղաքի կենտրոնում սեփականության ապօրինի վերաբաշխումներ են եղել: Ըստ նրա՝ պետք է որոշում ընդունել, որպեսզի Երևանի կենտրոնում այլևս շինարարություն չծավալվի, բարձրահարկեր չկառուցվեն:

Ինչ վերաբերում է մրցակիցներին և ընտրություններում հաղթանակ տանելու հավանականությանը ՝ բանախոսը նշեց, որ իրենց հնարավորությունները բարձր է գնահատում, քանի որ «իրենք ունակ են բալանսավորելու սևն ու սպիտակը»:

ՀՅԴ ավագանու թեկնածու, իրավաբան Լուսինե Քարամյանը (ով մայրական կողմով Ալեքսանդր Թամանյանի ծոռնուհին է) իր հերթին նկատեց՝ շատ կարևոր է, որ Երևանը համաչափ զարգանա: «Եթե ծնվել ես Կենտրոնում, մեծ հնարավորություններ ունես՝ կազմակերպելու քո առօրյան, իսկ ահա ծայրամասերում անգամ սրճարաններ և ժամանցային վայրեր չկան»,- ասաց նա:

Միաժամանակ շեշտեց, որ մայրաքաղաքում թամանյանական նախագծից շեղումներն ահռելի են, և Երևանի ավագանին պետք է գտնի օպտիմալ տարբերակ՝ ոչ միայն խուսափելու շեղումներից, այլև եղած շեղումները շտկելու: