Ձեր վստահելի աղբյուրը

Իրենց հոր՝ Միխայիլ Խաչատուրյանին սպանելու մեջ մեղադրվող Խաչատուրյան  երեք քույրերից ավագները՝ 19-ամյա Քրիստինան և 18-ամյա Անգելինան, Սերբսկիի անվան ինստիտուտում հոգեբուժական փորձաքննությունից հետո վերադարձվել են  մեկուսարան։ ՏԱՍՍ-ին հայտնել է Մոսկվայի հասարակական դիտորդական հանձնաժողովի պատասխանատու քարտուղարը։

«Քրիստինա և Անգելինա Խաչատուրյաններն այսօր Սերբսկիի անվան ինստիտուտից, որտեղ ենթարկվել են հոգեբուժական փորձաքննության, վերադարձել են №6 մեկուսարան»,- ասել է նա։

Սեպտեմբերի 14-ին փաստաբան Ալեքսեյ Լիպցերը հայտարարել էր, որ փորձագետները Քրիստինային և Անգելինային ճանաչվել էին մեղսունակ։ Խաչատուրյան քույրերից կրտսերը՝ 17-ամյա Մարիան, հոր սպանության պահին անմեղսունակ է ճանաչվել, նրան տեղափոխել են Մոսկվայի «Բուտիրկա» բանտի հոգեբուժական բաժանմունք։

Հիշեցնենք, որ ՌԴ քննչական կոմիտեն հայտնել էր, որ հուլիսի 27-ին Ալտուֆևյան մայրուղու բազմահարկերից մեկի մուտքում հայտնաբերվել է  57-ամյա տղամարդու մարմին՝ պարանոցի և կրծքավանդակի շրջանում դանակի բազմաթիվ հարվածներով։  ՔԿ  տվյալներով, նրան դանակով հարվածներ են հասցրել երեք աղջիկները։ Նրանց  մեղադրանք է առաջադրված։  Աղջիկները հաստատում են, որ տղամարդը, գտնվելով թմրամիջոցի ազդեցության տակ, առաջինն է հարձակվել  նրանց վրա դանակով, նրանք էլ պաշտպանվել են։ Հարցաննությանն աղջիկները խոստովանել են մեղքն ու պարզաբանել, որ իրենց  և իրենց հոր միջև թշնամական հարաբերություններ էին հաստատվել այն պատճառով, որ նա երկար ժամանակ իրենց բարոյական տառապանքներ է պատճառել։Խաչատուրյան քույրերը  օգոստոսի 2-ից կալանավորված են։