Ձեր վստահելի աղբյուրը

«ՀՀ ԱԺ արդարադատության իրականացմանը խոչընդոտելու, արդար դատաքննության իրավունքի և հեռախոսային խոսակցությունների գաղտնիությունը խախտելու փաստերի առնչությամբ երկրում մարդու իրավունքների պաշտպանվածության մակարդակը քննության առարկա դարձնելու նպատակով ստեղծված քննիչ հանձնաժողովի կազմավորման առիթը բոլորին հայտնի է, հիմքերը լիագումար նիստում ներկայացրել ենք մեր հանրությանը»,- հանձնաժողովի անդրանիկ նիստի ժամանակ այսօր ասաց պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Գևորգ Կոստանյանը:

«Բավականին մտահոգիչ փաստերի առնչությամբ ենք այս հանձնաժողովը ձևավորել, որովհետև այդ փաստերը վտանգում են երկրում հեռախոսային զրույցների և գաղտնիության երաշխավորված այլ իրավունքների իրացման և արդար դատաքննության ապահովման սկզբունքները: Հիմնական մտահոգության առարկան այն է, որ եթե ՀՀ-ում գաղտնալսում են ԱԱԾ տնօրենին և ՀՔԾ պետին, նշանակում է, որ որևէ քաղաքացի երաշխավորված չէ իր մասնավոր կյանքի իրավունքի անօրինական միջամտությունից, իսկ դա բացարձակ երաշխիք հանդիսացող սկզբունք է»,- ասաց Կոստանյանը:

Բացի այդ՝ չափազանց կարևոր նշանակություն ունի արդար դատաքննության իրավունքի միջամտության բացառման անհրաժեշտությունը՝ ցանկացած քրեական գործով:

«Մենք պետք է միանշանակ կարողանանք արդար դատաքննության իրավունքը երաշխավորել՝ ցանկացած քրեական և քաղաքացիական գործով, որովհետև ցանկացած քրգործ՝ անգամ ապացույցներով բացարձակ հաստատված լինելու պայմաններում, եթե խախտված եղավ արդարադատության իրականացման միջամտելու անթույլատրելիության սկզբունքը, ամբողջ գործի քննությունը դառնում է ոչ օբյեկտիվ: Եթե որևէ քրեական գործով հաստատվեց արդարադատության իրականացման անօրինական միջամտության փաստը, դա մեխանիկորեն հանգեցնելու է տվյալ գործով անցնող մեղադրյալների արդարացման, որովհետև քրեական դատավարությունը համարվելու է արդարության կանոնների խախտմամբ իրականացված»,- ասաց պատգամավորը:

Գևորգ Կոստանյանի խոսքով, չափազանց կարևոր է, որ այս երկու սկզբունքների երաշխավորված լինելու հանգամանքը հանձնաժողովի կողմից դետալային քննարկման առարկա դառնա:
«Մեզ համար մեծ նշանակություն ունի նախաքննության օրինականության նկատմամբ հսկողության սահմանադրական պարտականության ապահովումը»,- ասաց նա:

Գևորգ Կոստանյանը հանձնաժողովի անդամներին առաջարկեց մեկշաբաթյա ժամկետի ընթացքում առաջարկներ ներկայացնել հանձնաժողովի աշխատակարգի մեխանիզմների, հանձնաժողովի նախագահի տեղակալի թեկնածուի առաջադրման, պետական մարմիններից պահանջվող փաստաթղթերի ցանկի, միջազգային կազմակերպություններից մասնագետներ հրավիրել-չհրավիրելու, այս կամ այն պաշտոնյային հրավիրելու մասով: Ընդ որում, հրավիրված պետական և ՏԻՄ պաշտոնյաները պարտավոր են ներկայանալ հանձնաժողովի նիստերին, իսկ ոչ պաշտոնատար հրավիրված անձինք կարող են նիստերին գալ կամ չգալ»,- ասաց պատգամավորը:

Կոստանյանը ներկաներին տեղեկացրեց, որ հանձնաժողովի հաջորդ նիստը տեղի կունենա եկող չորեքշաբթի: