Ձեր վստահելի աղբյուրը

«Մտահոգ ենք Երևանում առկա սանիտարահիգենիկ խնդիրներով»,- այս մասին այսօր պաշտոնավարման 100 օրվան ասուլիսում ասաց  ՀՀ տարածքային կառավարման և զարգացման նախարար Սուրեն Պապիկյանը:

Նրա խոսքով՝  վարչապետի կողմից տրվել են խնդրի կարգավորման վերաբերյալ հանձնարարականներ,  հանդիպումներ է ունեցել թե «Սանիթեք» ընկերության գործադիր տնօրենի, թե Երևանի քաղաքապետի պաշտոնակատար Կամո Արեյանի հետ:

«Այս հանդիպումները բերել են նրան, որ «Սանիթեք»-ը վերջին ամիսներին երկու անգամ տուգանվել է՝ համաձայնագրով ստանձնած պարտավորություններում թերանալու համար: Իհարկե, կան խնդիրներ կապված բնակիչների կողմից աղբարկղերի այրման հետ,  ակայն սա լուծում է պահանջում՝ անկախ նրանից, թե որքանով են օբյեկտիվ կամ սուբյեկտիվ առաջացած խնդիրները»,- ասաց Սուրեն Պապիկյանը:

Ըստ նախարարի՝ իրենց անմիջական պահանջով «Սանիթեք» ընկերությունը քայլեր է ձեռնարկել նոր աղբահան մեքենաներ ներկրելու համար: Արդյունքում, 5 նոր մեքենաները վաղը կլինեն Երևանում և աղբահանության խնդիրն ավելի նորմալ կիրականացվի:

Միաժամանակ Սուրեն Պապիկյանը հայտնեց, որ ապահովագրական որոշ քայլեր են կատարել, քանի որ վստահություն չկա «Սանիթեք»-ի նկատմամբ, որը բազմիցս խոստումներ է տվել քաղաքապետարանին ու կառավարությանը, բայց խախտել է պայմանագրի կետերը:

«Որպեսզի Ֆրանկոֆոնիայի օրերին և Երևանի տոնի կապակցությամբ  խնդիրներ չունենանք, հանձնարարական եմ տվել համապատասխան գերատեսչություններին, նաև Երևանի քաղաքապետի պաշտոնակատարի հետ քննարկել ենք՝ անհրաժեշտության դեպքում այլ համայնքներից տեխնիկա ներգրավելու հարցը: Արդեն իսկ նախանշված են, թե որ համայնքներից է հնարավոր բերել տեխնիկան: Անկախ «Սանիթեքի» հետագա  աշխատանքներից, վստահաբար կարող ենք ասել, որ տոներին և միջազգային միջոցառումներին ընդառաջ Երևանը պատրաստ կլինի ընդունել հյուրերին որպես մաքուր քաղաք»,- ասաց Սուրեն Պապիկյանը: