Ձեր վստահելի աղբյուրը

«Այս քարոզարշավն իր ագրեսիայով, սոցիալական ցանցերում կեղտով առանձնացավ նախկին բոլոր քարոզարշավներից»,-Մատենադարանի հարակից տարածքում լրագրողների հետ զրույցում այսօր ասաց «Բարգավաճ Հայաստան» կուսակցության քաղաքապետի թեկնածու Նաիրա Զոհրաբյանը:

նա շեշտեց, որ իր և «Լույս» դաշինքի քաղաքապետի թեկնածու Արտակ Զեյնալյանի դեմ ուղղորդված վիրավորելու, հայհոյելու գործընթաց կա:

«Հստակ փաստերն արդեն ներկայացված են ոստիկանություն: Ես չեմ ներկայացրել, ես բացարձակապես մտադրություն չունեի իրենց դիմելու, որովհետև կարծում եմ, որ բոլոր հնարավորություններն ունեին հետևելու՝ ինչ է կատարվում իմ հանդեպ: Զանգահարել են ինձ, խնդրել են փաստեր ներկայացնել, ես ներկայացրել եմ շատ աննշան փաստեր: Պետական կառույցներում, օրինակ, Սփյուռքի նախարարությունում, Կրթության նախարարությունում, «Իմ քայլը» դաշինքի ավագանիների, ՔՊ անդամների ամենագռեհիկ արտահայտություններ են հնչում:

Սփյուռքի նախարարության կին աշխատակից՝ Անուշ Լալայանը, հայհոյանք չեմ ասի, բացեք իր ֆեյսբուքյան էջը, խուլիգանի հայհոյանքներ է հնչեցրել: Հույս ունեի, որ այս ընտրություններին բարոյական չափանիշներ փոխված կլինեին, բայց այսպիսի գրոհ կնոջ հանդեպ չէի սպասում: Սա մեկ բանի մասին է խոսում, որ իրենք թույլ են, վախեցած են և խուճապի մեջ են: Այս առումով ես համարում եմ սա ամենանողկալի ընտրապայքարն է, որին մասնակցել եմ»,- ասաց Զոհրաբյանը։

Քաղաքապետի թեկնածուն քարոզարշավը երկու մասի բաժանեց: Բացասականը, ըստ նրա ագրեսիան է և սոցիալական ցանցերում թեկնածուներին «սևացնելը»: Իսկ դրականը, նրա համոզմամբ, այն է, որ որևէ ուժ ընտրակաշառք չի բաժանել և չի բաժանելու:

«Սա առաջին ընտրությունն է վերջին 20 տարիներին, որ որևէ ընտրակեղծարարության տեխնոլոգիա չկա, ընտրակաշառք չկա: Վարչական ռեսուրսի կիրառում, հույս ունենանք, որ չի լինի»,- ասաց նա:
 

Նաիրա Զոհրաբյնաը նաև հավելեց, որ «Բարգավաճ Հայաստան» կուսակցության ծրագիրը միակն է ներկայացված ծրագրերից, որը լուծումներից բացի առաջարկում է կոնկրետ ներդրումներ և ներդրումային փաթեթներ։

Նա նշեց, որ ներդրումային փաթեթները վերաբերում են ինչպես  տրասնպորային համակարգին, այնպես էլ վերելակների և այլ խնդիրների։ Անդրադառնալով քարոզարշավին մասնակցող ուժերի հետ հետագա համագործակցությանը՝ Նաիրա Զոհրաբյանը նշեց, որ իր քաղաքական ուղերձն այդ ուժերին արդեն  հղել է, պատրաստ է քաղաքապետ ընտրվելու դեպքում համագործակցել բոլորի հետ՝ բացի մեկից, քանի որ իր համար անընդունելի է «Մեր դեմ խաղ չկա»-ն։

«Բոլոր քաղաքական ուժերին, բացառությամբ մեկի, ասում եմ` միասին ենք կառավարելու Երևանը»,- ասաց  Նաիրա Զոհրաբյանը։