Գևորգ Կոստանյանը չի բացառում, որ գաղտնալսում են նաև իր հեռախոսը
«Այն հանգամանքը, որ մենք ունենք անօրինական գաղտնալսում, այն էլ՝ երկրի ԱԱԾ պետի խոսակցության գաղտնալսում, յուրաքանչյուր քաղաքացու ողջամտորեն կարող է հանգեցնել կասկածի, որ իր իրավունքները պաշտպանված չեն»,- ԱԺ-ում լրագրողների հետ զրույցում այսօր ասաց պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Գևորգ Կոստանյանը:
Նա չբացառեց, որ գաղտնալսում են նաև իր հեռախոսը, նման մտահոգություն, հավանաբար, ունի ցանկացած քաղաքացի:
«Իսկ ինչ վերաբերում է քրեական գործի հարուցված կամ չհարուցված լինելու հանգամանքին, իհարկե, մենք այդ մասով քրեական գործի հանգամանքերի մեջ իրավասու չենք մտնելու և դրա համար այդ մասով մենք քննարկման առարկա դարձնելու ենք մեխանիզմների և գործիքակազմի առկայության հանգամանքը: Ինչ վերաբերում է արդար դավատաքննության երաշխիքի երաշխավորմանը, այն ենթադրում է քրեական արդարադատության անօրինական միջամտության բացառում: Պետությունը պարտավոր է ձեռնարկել գործնական և օրենսդրական քայլեր՝ բացառելու արդար դատաքննության իրավունքի միջամտության անօրինական ցանկացած դրսևորում:
Հաշվի առնելով, որ քրեական գործ հարուցվել է հեռախոսային զրույցների գաղտնիության խախտման և պաշտոնական լիազորությունների սահմանն անցնելու կապակցությամբ, բայց մենք Քրեական օրենսգրքում ունենք հատուկ նորմ՝ արդարադատության իրականացմանը խոչընդոտելը: Իսկ այդ փաստի կապակցությամբ քրեական գործ հարուցված չէ: Հետևաբար, այդ շրջանակներում ՀՀ ԱԺ արդարադատության իրականացմանը խոչընդոտելու, արդար դատաքննության իրավունքի և հեռախոսային խոսակցությունների գաղտնիությունը խախտելու փաստերի առնչությամբ ստեղծված քննիչ հանձնաժողովն իրավասու է ամբողջությամբ քննություն իրականացնել»,- ասաց Գևորգ Կոստանյանը:
Պատգամավորը նկատեց` իրենց համար չափազանց կարևոր է, որ և հեռախոսազրույցների գաղտնիության, և արդարադատությանը իրականացմանը խոչընդոտելու փաստերը կապված են կոնկրետ քրեական գործերի նախաքննության ընթացքի կամ կալանավորման միջնորդությունների օրինականության հետ:
«Քանի որ ՀՀ Սահմանադրությամբ նախաքննության և հետաքննության օրինականության նկատմամբ հսկողությունն իրականացվում է դատախազության կողմից, այսինքն՝ դատախազությունն այն սահմանադրական մարմինն է, որի հիմնական առաքելությունը հանդիսանում է հետաքննության և նախաքննության օրինականության երաշխավորումը, մենք նաև պետք է քննարկման առարկա դարձնենք՝ արդյոք տվյալ գործի շրջանակներում իրականացվում է պատշաճ հսկողություն օրիանականության կատարման նկատմամբ:
Ցանկացած քրեական գործով՝ կապ չունի՝ ում վերաբերյալ է, կապ չունի՝ ինչ հանցագործության փաստի կապակցությամբ է, անգամ ապացույցների բացարձակ առկայության պայմաններում, եթե մենք ունենում ենք անօրինական միջամտության դրսևորում, դա ամբողջ արդարադատությունը դարձնում է ոչ օբյեկտիվ»,- ասաց Գևորգ Կոստանյանը:
Հարցին՝ ինքը հայտնի ձայնագրության մեջ միջամտությո՞ւն է տեսնում, ինչի շրջանակներում էլ ԱԺ քննիչ հանձնաժողովում քննարկման առարկա կդարձնեն ՀՀ երկրոդ նախագահ Ռոբերտ Քոչարյանի դեմ քրեական գործը, նշեց. «Ես կոնկրետ քրեական գործի մասին չեմ խոսում, ես խոսում եմ երևույթի մասին՝ դա կլիներ Քոչարյանի, թե մեկ այլ գործով, դա նշանակություն չունի»:
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
