Ձեր վստահելի աղբյուրը

Մարդու իրավունքների եվրոպական դատարանն այսօր հրապարակել է «Գասպարին ըննդեմ Հայաստանի» գործով վճիռը։

Գործը վերաբերում է 2008թ.-ի նախագահական ընտրություններից հետո տեղի ունեցած բողոքի ցույցերին ու մարտի 1-ին ոստիկանության ու ցուցարարների բախման արդյունքում 1957թ.-ին ծնված Վարդգես Գասպարիի ձերբակալմանը՝ ոստիկանության աշխատակցին վիրավորելու մեղադրանքով։

ՄԻԵԴ կայքում նշվում է, որ Գասպարին մեղավոր է ճանաչվել ու դատապարտվել 1 տարվա ազատազրկման 2008թ.-ի նոյեմբերին՝ ազատ արձակվելով 2009թ.-ի փետրվարին։

Գասպարին ՄԻԵԴ դիմել էր Մարդու իրավունքների եվրոպական կոնվենցիայի հոդված 3-րդի հիման վրա (խոշտանգումների և անմարդկային կամ արժանապատվությունը նվաստացնող վերաբերմունքի արգելում)՝ մասնավորապես բողոքելով բանտային պայմաններից։

Կոնվենցիայի 5-րդ հոդվածի 3-րդ կետով Գասպարին (ազատության և անվտանգության իրավունք, ողջամիտ ժամկետում դատաքննության իրավունք) բողոքել է, որ տեղական դատարանները հիմնավոր պատճառներ չեն ներկայացրել իր ձերբակալման համար։

ՄԻԵԴ-ը գտել է, որ տեղի է ունեցել Կոնվենցիայի 3-րդ հոդվածի մասնակի դեպքերով խախտում ու հոդված 5-ի 3-րդ կետի խախտում։

Հայաստանը Վարդգես Գասպարիին կվճարի 4000 եվրո՝ որպես ոչ նյութական վնասի փոխհատուցում։

Նշենք նաև, որ այսօր հրապարակվել է նաև «Սաղաթելյանն ընդդեմ Հայաստանի» գործով վճիռը, որով ՄԻԵԴ-ը խախտված էր համարել հայցվորի իրավունքներն ու պարտավորեցրել Հայաստանին վճարել 15.600 եվրո՝ որպես ոչ նյութական վնասի փոխհատուցում, ինչպես նաև 5000 եվրո՝ կատարված ծախսերի համար։