Ձեր վստահելի աղբյուրը

ԱԱԾ տնօրեն Արթուր Վանեցյանը հայտնի գաղտնալսման գործով հարցաքննվել է: Այս մասին լրագրողների հետ զրույցում այսօր ասաց ինքը՝ Վանեցյանը:

Նա, սակայն, հարցաքննությունից մանրամասներ չհայտնեց:

«Ես փաստաթուղթ եմ ստորագրել նախաքննական գաղտնիք չհրապարակելու մասին»,- ասաց ԱԱԾ տնօրենը՝ հարցերի չպատասխանելը բացատրելով այս պատճառաբանությամբ:

Հարցին՝ տարօրինակ չէ, որ կարողանում են գաղտնալսել ԱԱԾ տնօրենին, Վանեցյանըւ պատասխանեց, որ թերացումներ չեն եղել, աշխարհի շատ երկրներում շատ պաշտոնյաների են գաղտնալսել:

«Տեխնիկայի դարում միշտ մի բան մի քայլ առաջ է լինում, տեխնիկայի մեջ խոցելի տեղեր են լինում:Ես թաքուն որևէ բան չեմ անում, ես խոսում եմ և կարող եմ պատասխան տալ ցանկացած ասածիս և արածիս մասին»,- ասաց նա:

Իսկ իրեն հայտնի է՝ Հայաստանում որ օլիգարխն ունի գաղտնալսող սարքեր, հետաքրքրվեցին լրագրողները: ԱԱԾ տնօրենը նշեց, որ ինքը այդ հարցին չի կարող պատասխանել, հարցերի պատասխանը կտա նախաքննությունը: Նա շեշտեց, որ քանի որ գործը վերաբերում է անմիջականորեն իրեն, ինքը դրան չի խառնվում:

Արթուր Վանեցյանն  անդրադարձավ նաև ՀՀ երրորդ նախագահի եղբոր՝ Ալեքսանդր Սարգսյանի հաշիվների վրա դրված կալանքին՝ տեղեկացնելով, որ կալանքը չի հանվել, այդ հարցը կորոշվի միայն քննությունից հետո:

«Դա օրենքի շրջանակներում է»,- նշեց նա՝ հավելելով, որ մշտապես նոր բացահայտումներ են լինելու, ինչպես օրինակ երկու օր առաջ  մեծ քանակությամբ թմրամիջոցների առգրավումը: