Ձեր վստահելի աղբյուրը

Երեկ ՀՀ արտգործնախարարության մամուլի խոսնակ Տիգրան Բալայանը միջազգային հանրության՝ առաջին հերթին ԵԱՀԿ Մինսկի խմբի համանախագահ երկրների ուշադրությունն էր հրավիրել սահմանային իրադրության հետագա սրումը կանխելու նպատակով Բաքվին սանձելու և կառուցողական դաշտ բերելու հրատապ անհրաժեշտության վրա։

ԱԳՆ պաշտոնական ներկայացուցիչը հիշեցրել էր, որ վերջին շրջանում Ադրբեջանը շարունակաբար գնդակոծում է հայ-ադրբեջանական պետական սահմանը՝ թիրախավորելով և վնաս հասցնելով դրա երկայնքով գտնվող բնակավայրերին, քաղաքացիական հաստատություններին և խաղաղ բնակչությանը։

Panorama.am-ի թղթակիցը թեմայի շուրջ զրուցեց Արցախի Հանրապետության նախագահի աշխատակազմի տեղեկատվության գլխավոր վարչության պետ Դավիթ Բաբայանի հետ։

Հարցին՝ հայկական կողմի կոչը ի՞նչ գործուն հետևանքներ կարող է ունենալ կառույցի արձագանքի և իրավիճակը շտկելուն ուղղված քայլեր ձեռնարկելու տեսանկյունից, մեր զրուցակիցը պատասխանեց.

«ԵԱՀԿ Մինսկի խմբի համանախագահությանն ուղղված այսպիսի փաստացի, պաշտոնական դիմումը չի կարող անհետևանք մնալ կամ անուշադրության մատնվել։ Դա պարզապես հնարավոր չէ պատկերացնել։ Միանշանակ է, որ այդ կառույցն ընդունելու է իրեն հասցեագրված կոչը և փորձելու է Ադրբեջանին փոխանցել համանախագահության կարծիքը։

Եթե այդ երկիրը տապալում և խարխլում է ԵԱՀԿ Միսկի խմբի համանախագահների ջանքերը և վտանգում տարածաշրջանային խաղաղությունն ու կայունությունը, նրա նման պահվածքը պետք է անընդունելի լինի բոլորի համար։ Իհարկե, պետք է հետևողական աշխատանք տարվի, որպեսզի ԵԱՀԿ Մինսկի խումբը և միջազգային հանրությունը մշտապես տեղեկացված լինեն Ադրբեջանի քաղաքականության մասին»,- ասաց Դավիթ Բաբայանը՝ շեշտելով, որ ագրեսորը միշտ պետք է իմանա՝ հայկական կողմն ուժեղ է և միասնական։

Իսկ հնարավո՞ր է, որ գոնե հիմա հայկական կողմի կոչին հետևեն ԵԱՀԿ Մինսկի խմբի հասցեական գնահատականները, Արցախի Հանրապետության նախագահի աշխատակազմի տեղեկատվության գլխավոր վարչության պետը նկատեց՝ կառույցն աշխատելու է հավասարակշռություն պահպանել։

«Մեր ամենակարևոր նպատակը ոչ միայն այն է, որ նրանք հրապրակայնորեն դիմեն Ադրբեջանին, այլ ոչ հրապարակային խողովակներով իրենց համապատասխան կարծիքը հայտնեն»,- ամփոփեց Դավիթ Բաբայանը։

Հիշեցնենք, որ Տիգրան Բալայանն իր հայտարարությունում նաև շեշտել էր՝ Բաքվի կողմից իրավիճակի լարմանը միտված գործողությունները, զուգակցվելով ռազմատենչ հռետորաբանության հետ, խաթարում են ԵԱՀԿ Մինսկի խմբի համանախագահ երկրների ու միջազգային հանրության կողմից խաղաղությանը նպաստող մթնոլորտի ձևավորմանն ուղղված ջանքերը: