Մեր որոշումը չի լինելու որևէ մեկի ճնշմամբ, որևէ մեկի դիկտատով. Նաիրա Զոհրաբյան
«Երբ որ արտահերթ խորհրդարանական ընտրությունների մասին նախագիծ կգա Ազգային ժողով, «Բարգավաճ Հայաստան» կուսակցությունը կքննարկի, մեր որոշումը կկայացնենք»,- 4/35 ընտրատեղամասում նախքան քվեարկությունը ասաց «Բարգավաճ Հայաստան» կուսակցության քաղաքապետի թեկնածու Նաիրա Զոհրաբյանը՝ պատասխանելով արտահերթ խորհրդարանական ընտրությունների մասին հարցին։
Նա նշեց, որ եթե անգամ կողմ լինեն խորհրդարանի լուծարմանն ու արտահերթ ընտրություներին, դա լինելու է բացառապես իրենց որոշումը և այդ որոշումը չի լինելու որևէ մեկի ճնշմամբ, որևէ մեկի դիկտատով։
«Դրանում կարող եք վստահ լինել»,- ընդգծեց Ն. Զոհրաբյանը։
Հարցին, եթե հասարակությունը ցանկանա, նմանատիպ ցույցեր նորից լինեն, նա ասաց. «Չի կարելի քաղաքական ուժերին սպառնալ ժողովրդով, որովհետև ինչպես «Քաղաքացիական պայմանագրի» հետևում կան կանգնած տասնյակ հազարավոր մարդիկ, վստահեցնում եմ ԲՀԿ-ն, «Լույսը», ՀՅԴ-ն, «Ժառանգությունը», «Երկիր Ծիրանին», բոլոր քաղաքական ուժերն ունեն այս կամ այն չափով իրենց համակիրները։ Ես ուղղակի անբարո եմ համարում, եթե մենք էլ ասենք՝ եթե այդպես է, մենք էլ մեր համակիրներին կհանենք հրապարակ և տեսեք, թե ում համակիրներն են ավելի շատ։ Չի կարելի։ Մենք մեր ժողովրդին ոչ թե պետք է պառակտենք, այլ միավորենք։ Ինձ համար երբեք չի եղել ու չկա սևի ու սպիտակի ջրբաժան»։
Քվեարկությունը կատարելուց հետո լրագրողները Նաիրա Զոհրաբյանից հետաքրքրվեցին, թե ո՞ւմ է տվել իր քվեն. «Իմ քվեն տվեցի բարեկարգ, հարմարավետ Երևանի օգտին, այն Երևանի, որը անպայմանորեն գալու է։ Երևանի խնդիրները լուծելու համար իսկապես պետք է նվիրում, համառ աշխատանք, լուրջ ներդրումներ։ ԲՀԿ-ն այդ ներդրումները բերել է։ Ես որպես քաղաքապետի թեկնածու ինձ համար եմ բացարձակ անկաշառ մարդ, նվիրյալ, Երևանի ֆանատ։ Ես սիրում եմ Երևանը։ Մենք ունենք պրոֆեսիոնալների թիմ, ովքեր կարող են, ունակ են Երևանը դարձնել զարգացող, բարեկարգ, Եվրոպայի մշակութային և տուրիզմի կենտրոններից մեկը։ Ես քվեարկել եմ 21-րդ դարի բարեկարգ, հարմարավետ, կայուն, խաղաղ, անվտանգ Երևանի օգտին»։
Նա հույս ունի, որ ընտրությունները կլինեն արդար, կանցնեն խաղաղ։
«Մեր պատասխանատուներին, հանձնաժողովի անդամներին, վստահված անձանց հորդորել ենք, որ անգամ եթե կլինեն պրովոկացիաներ, չարձագանքեն։ Ունենք տեղեկատվություն, որ տեղամասերում լինելու են պրովոկացիաներ, ուղարկելու են ինչ-որ երիտասարդների»,- ասաց Ն. Զոհրաբյանը։
Հարցին, թե ո՞վ է ուղարկելու, նա պատասխանեց. «Դե պարզ չէ՝ ով է անելու»։
Հարակից հրապարակումներ`
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
