Ձեր վստահելի աղբյուրը

Կենտրոնական ընտրական հանձնաժողովի նախագահ Տիգրան Մուկուչյանը այսօր լրագրողների հետ ճեպազրույցում անդրադարձավ սեպտեմբերի 22-ին՝ լռության օրը «Անկախ դիտորդ» դաշինքի կողմից հրավիրած մամուլի ասուլիսին, որի ընթացքում նրանք հայտարարել էին, թե իրենց տվյալներով, «Բարգավաճ Հայաստան» կուսակցությունը նախօրեին գումար է բաժանել իրենց նախաձեռնած ֆլեշմոբի մասնակիցներին:

«Մենք հեռախոսազանգ էինք կատարել հորդորելու՝ չիրականացնել նման ասուլիս, հշեցնելով քարոզչության արգելքի սկզբունքը և ձեռնպահ մնալ որոշակի արտահայտություններից, որ կարող են որակվել հակաքարոզչություն։ Երբ զանգահարեցինք, ասուլիսն արդեն մեկնարկել էր և զրույցը չկայացավ: Ասուլիսին որոշակի գնահատականներ հնչեցին, որոնց մասին ձեռնպահ կմնամ տեսակետ հայտնելուց: Դրանից հետո եղել է հեռախոսազրույց նախ տիկին Զոհրաբյանի հետ, որը տեղեկացնում էր, որ սրահում տեղի է ունենում ասուլիս, ինչի մասին արդեն տեղեկացված էինք»,-մանրամասնեց Մուկուչյանը։

Նրա խոսքով՝ ԿԸՀ-ն ծանոթ էր երկու կողմերի դիրքորոշումներին, բայց որպես այդպիսին, արարքը արդեն ավարտված արարք էր:

«Մենք նախնական աշխատանքային քննարկում կազմակերպեցինք և մոտեցումը այն է, որ վարույթ հրավիրվի, ուսումնասիրվի, բայց այն որպես այդպիսին ավարտված արարք էր և վարույթի հրավիրումը կարող էր հարթակ դառնար և ակամայից կոչ անելով զերծ մնալ լռության օրը քարոզչություն իրականացնելուց, մենք ինքներս կարող է մի հարթակ դառնայինք, որ այդ պրոցեսը վերածեր քարոզչության կամ հակաքարոզչության»,-պարզաբանեց Մուկուչյանը:

Նա ասաց, որ հենց այդ պատճառով քվեարկության օրը ձեռնպահ մնացին հարցի քննարկումից, իսկ հետագայում նախատեսում են այդ հանգամանքներով պայմանավորված վարույթ իրականացնել. «Երբ նման քարոզ է տեղի ունենում, անկախ նրանից, թե ընտրական հանձնաժողովները կազմում են արձանագրություն, թե ոչ, կողմն ուղղակի կարող է դիմել վարչական դատարան»։

Ինչ վերաբերում է ԿԸՀ ստացված դիմում-բողոքներին, ԿԸՀ նախագահը հայտնեց. «Կարող ենք արձանագրել մինչ այս պահը որևէ գրավոր-դիմում, բողոք որևէ տարածքային ընտրական հանձնաժողովից, ԿԸՀ-ում առկա չէ: Քվեարկության օրը եղել են բազմաթիվ ահազանգեր, քաղաքացիների կողմից հեռախոսազանգերի՝ մի մասը վերաբերում էր տեղեկատվության ստացմանը, մի մասը՝ իրավունքների պարզաբանումներ էին, բոլորի վերաբերյալ արագ արձագանք է եղել»։

Նա ասաց նաև, որ նախնական վերլուծություն կիրականացնեն հատուկ կարծիքներ, գրանցամատյանների գրառումների վերաբերյալ: 

Տիգրան Մուկուչյանը նաև մանրամասնեց. «ՏԻՄ ընտրությունների համար ԸՕ չի նախատեսում քվեարկությանը մասնակցած ընտրողների ստորագրած ցուցակների հրապարակման պարտադիր պահանջ, բայց հանձնաժողովը հիմք ընդունելով ԱԺ ընտությունների համար սահմանված իրավակարգավորումը և ևս մեկ լրացուցիչ գործիք տրամադրելու համար հանրային վերահսկողություն իրականացնելու տեսանկյունից՝ ընդունեց որոշում, համաձայն որ ստորագրված ցուցակները կսկանավորվեն և կհրապարակվեն: Դա հնարավորություն է տալու բոլորին հետևելու այդ ցուցակներին, անճշտություններ, կեղծ ստորագրություններ հայտնաբերելու պարագայում սահմանված է ժամկետներ՝ դիմումներ ներկայացնելու համար»։